Komisioni Qendror i Zgjedhjeve (KQZ) ka miratuar dje Qendrat e Votimit për shtetasit e Kosovës që jetojnë jashtë vendit. Votimi për këtë kategori qytetarësh do të zhvillohet më 27 dhjetor, një ditë para zgjedhjeve të jashtëzakonshme në Kosovë, të planifikuara për 28 dhjetor 2025.
Sipas vendimit të KQZ-së, procesi i votimit do të organizohet në 50 përfaqësi diplomatike, me gjithsej 66 vendvotime të vendosura në 36 shtete të botës.
Përveç përfaqësive diplomatike, Qendrat e Votimit do të hapen edhe në hapësira shtesë, sipas propozimit të Ministrisë së Punëve të Jashtme dhe Diasporës. Këto lokacione përfshijnë 10 Qendra të Votimit shtesë (Gjermani 5; Zvicër 3; Mbretëri e Bashkuar 1; SHBA 1), me gjithsej 43 vendvotime dhe një kapacitet maksimal prej 40,850 votuesish.
Në total, numri i Qendrave të Votimit jashtë Kosovës të miratuara nga KQZ arrin në 60, me gjithsej 109 vendvotime, ndërsa numri maksimal i votuesve që mund të regjistrohen për të votuar në këto qendra është 103,550. KQZ sqaron se kufizimi i votuesve vlen vetëm për votimin në përfaqësi diplomatike, ndërsa votimi përmes postës nuk ka kufizim në numrin e votuesve.
Periudha e regjistrimit për votuesit jashtë Kosovës ka filluar më 26 nëntor dhe do të përfundojë më 6 dhjetor 2025.
Listën e plotë të Qendrave të Votimit jashtë vendit mund ta gjeni KËTU.
