Që nga shpërthimi i konfliktit në vitin 2014, e veçanërisht pas agresionit rus në shkurt të vitit 2022, qindra qytetarë serbë janë bashkuar me forcat proruse. Disa të motivuar nga ideologjia, disa nga lidhjet kulturore dhe historike, e të tjerë për përfitime financiare si mercenarë të paguar.
Një listë e detajuar me më shumë se 100 emra është publikuar së fundmi nga projekti ukrainas “Dua të jetoj”, i cili është pjesë e një iniciative për dorëzimin e ushtarëve rusë, transmeton KosovaPress.
Në këtë listë përfshihen edhe emra të shtetasve të Serbisë që, sipas autorëve të këtij publikimi, kanë marrë pjesë në luftën në Ukrainë në anën e Federatës Ruse – shumica si mercenarë të kontraktuar, të tjerë si mbështetës aktivë të luftës ruse.
Në listë gjenden më shumë se 100 emra të serbëve, duke përfshirë datat e lindjes, numrat e dokumenteve personale, datat e nënshkrimit të kontratave me ushtrinë ruse, madje edhe datat e vdekjes së disa prej tyre.
Në listë është gjithashtu edhe i vrari Bratislav Zhivkoviq, për të cilin organizata dhe individë me prirje nacionaliste dhe pro-ruse në Serbi, kanë promovuar hapur përfshirjen në konfliktin në Ukrainë. Bratisllav Zhivkoviq, i cili së fundmi u vra në luftimet në Ukrainë, ka qenë pjesëmarrës në ngritjen e barrikadave në veri të Kosovës, ka udhëhequr një pjesë të grupeve serbe që operojnë në Donbas që nga viti 2014, kur Rusia aneksoi Krimenë dhe nisi konfliktin në lindje të Ukrainës.
Në shumicën e rasteve, këta vullnetarë i janë bashkuar formacioneve ushtarake të vetëquajtura “Republika Popullore e Donetskut” apo “Republika Popullore e Luhanskut”, por me kalimin e viteve, shumë prej tyre janë integruar edhe në njësitë zyrtare të ushtrisë ruse.
