Sistemet raketore anti-tank “Javeline” që janë më të sofistikuarat pritet që të jenë në dispozicion të Forcës së Sigurisë së Kosovës.
Në kazermat e FSK-së erdhën edhe dronët Bayraktar gjatë vitit të kaluar.
Të gjitha këto investime në armatimin e ushtrisë u bënë pas themelimit të Fondit të Sigurisë nga Qeveria e Kosovës, mjetet të cilat sipas Kurtit, do të dedikohen për ushtrinë e vendit.
Por, edhe një vit pas themelimit të këtij fondi, paratë në këtë fond nuk janë bërë publike.
Andaj shoqëria civile po kërkon transparencë për këtë çështje.
Gzim Shala nga Instituti Kosovar për Drejtësi, thotë se me publikimin e këtyre informatave nuk cenohet siguria kombëtare, për shkak se paratë janë të qytetarëve.
Teksa tregon disa nga arsyet që sipas tij, institucionet po i mbajnë të fshehta të dhënat e këtij fondi.
Ndërsa nga Agjencia për Informim dhe Privatësi, treguan për televizionin se kanë pranuar ankesa për një gjë të tillë, por që nuk mund të bëjnë deklasifkimin e informacioneve, por vetëm inicim të procedurave.
“Ju sqarojmë se bazuar në kompetencat ligjore të përcaktuara me Ligjin Nr. 06/L-082 për Mbrojtjen e të Dhënave Personale dhe Ligjit Nr. 06/L-081 për Qasje në Dokumente Publike, Agjencia nuk ka kompetencë të bëjë de-klasifikimin e informatave të klasifikuara nga institucionet publike, por mund të bëjë vetëm inicimin e procedurës për de-klasifikim, ashtu siç është përcaktuar me nenin 28 të Ligjit Nr.06/L-081 për Qasje në Dokumente Publike, i cili shprehimisht parasheh se ‘Agjencia është gjithashtu kompetent që të inicioj procedurën për de klasifikimin e dokumenteve të klasifikuara’ , për të cilin komunikim ashtë e njoftuar edhe pala kërkuese. Në kuadër të trajtimit të çështjes së adresuar, bazuar në përgjegjësitë e saj, Agjencia për Informim dhe Privatësi do të vazhdojë komunikimin me institucionin përgjegjës dhe Organizatat Jo -qeveritare, si partnerë të rëndësishëm të Agjencisë në promovimin e transparencës dhe llogaridhënies.”
Tëvë1 ka kërkuar përgjigje edhe nga Ministria e Financave e cila është përgjegjëse për këtë fond, por që deri në publikimin e kronikës nuk ka pranuar përgjigje.
