Më 16 prill u mor vendimi për shtrenjtimin e çmimit të energjisë elektrike për 16.1 për qind.
Mirëpo kjo rritje, nuk do të vlejë edhe për komunat veriore të vendit, me shumicë serbe.
Të paktën kështu thonë nga Zyra e Rregullatorit për Energji, ku tregojnë se vendimi për miratimin e tarifave të reja zbatohet vetëm për furnizuesin me Shërbim Universal që aktualisht është KESCO.
“Konsumatorët në katër komunat veriore të Kosovës (Leposaviq, Zveçan, Zubin Potok dhe pjesë të Mitrovicës Veriore) nuk janë të përfshirë në këtë vendim tarifor, për shkak se ata furnizohen nga kompania Elektrosever. Elektrosever është furnizues i licencuar nga ZRRE për të operuar në atë pjesë të territorit, mirëpo nuk është Furnizues me Shërbim Universal dhe si rrjedhojë, ZRRE nuk përcakton tarifat përfundimtare për konsumatorët që furnizohen nga kjo kompani”, thuhet nga ZRrE.
Kësisoj, sipas këtij institucioni, Elektrosever ka vetë në duar përcaktimin e tarifave.
“Ky operator është i obliguar të paguajë tarifat për shfrytëzimin e këtyre rrjeteve, sipas vendimeve të miratuara nga Bordi i ZRRE-së. Megjithatë, tarifat që Elektrosever u aplikon konsumatorëve të saj janë në kompetencën e vetë kësaj kompanie dhe nuk përcaktohen nga ZRRE-ja. Në këtë kontekst, theksojmë se diferencimi ne tarifa rrjedh nga dallimet në strukturën e furnizuesve dhe përgjegjësive që ata mbajnë sipas licencave të tyre përkatëse”, ka sqaruar ZRrE.
E sipas njohësit të fushës së energjisë, Adhurim Haxhimusa nuk është e domosdoshme ngritja e çmimit të energjisë, andaj edhe siç thotë ai, vendimi mund edhe të mos zbatohet nga Elektosever.
“Nëse Elektrosever nuk e bën ngritjen e tarifave atëherë ajo duhet me garantu se ka me pasë funksionim të mirëfilltë, ka me pasë stabilitet financiar edhe për tjerat pjesë Zyra e Rregullatorit të Energjisë nuk është përgjegjëse nëse ajo e implementon apo nuk e implementon këtë për shkak se ajo është përgjegjëse për kompanitë Elektro severi për mirëmbajtjen fincnaraire të librave të kontabilitetit të saj”, vlerëson ai.
Ai tregoi se konsumatorët tjerë nuk kanë mundësi të kyqen në shërbimet e këtij operatori, për shkak se nuk ka ende liberalizim të tregut ku konsumatorët e zgjedhin vetë furnizuesin.
