Ndër të parët, u paraqit në gjykatore.
Është dëshmitar për krimet e kryera gjatë luftës në Vushtrri.
Naim Haliti erdhi i përgatitur të dëshmonte në gjyqin kundër dyshes Zoran Kostiq dhe Dragan Miloviq.
Mirëpo, dëshmia e tij nuk filloi të premten, ashtu siç ishte planifikuar.
Kjo për shkak se deklarata e tij në Prokurori, nuk i është dorëzuar mbrojtjes së të akuzuarve në kohë e përkthyer në gjuhën serbe.
“Nuk jemi gati të vazhdojmë me këtë dëshmitar pasi tek tani e kemi pranuar deklaratën e dëshmitarit të përkthyer në serbisht. E kemi pranuar para dhjetë minutash. Dhe na nevojitet kohë që ta shqyrtojmë këtë deklaratë. Po e kundërshtojmë dëgjimin e dëshmitarit sot”, tha avokati i Kostiq, Predrag Miljkoviq.
Prokuroria u arsyetua se kjo vonesë ka ardhur për arsye teknike, ndërkohë që pati një propozim për dëgjimin e këtij dëshmitari.
“Për mos me zvarrit këtë procedurë, të paktën dëshmitari të merret në pyetje të paktën nga ana e prokurorisë. Nuk është ndonjë deklaratë shumëfaqëshe”, prokurorja e specializuar, Florije Salihu.
Por, kjo nuk u aprovua nga ana e trupit gjykues.
Seanca për gjyqin e Kostiq dhe Miloviq, u shtye për në muajin nëntor, ku do të dëgjohet ky dëshmitar.
Kostiq e Miloviq, akuzohen se gjatë luftës si pjesëtarë të policisë serbe, kishin vrarë, maltretuar, plaçkitur e shkatërruar shtëpitë nëpër fshatrat e komunës së Vushtrrisë.
