Kryetari aktual i Komunës së Podujevës dhe kandidati i Lëvizjes Vetëvendosje për një mandat të dytë, Shpejtim Bulliqi, në emisionin “Këndi i debatit” në Tëvë1 ka deklaruar se qyteti tashmë ka një stacion të funksionalizuar të autobusëve dhe se në mandatin e ardhshëm planifikon të vë në funksion trafikun urban, projekt ky që nuk u realizua gjatë mandatit të parë për shkak të sfidave infrastrukturore dhe buxhetore.
“Stacioni i autobusëve është rregulluar dhe është funksional. Është bërë lidhja Prishtinë–Podujevë me 25 deri në 30 autobusë minimalisht, të cilët i shërbejnë qytetarëve të Llapit. Është ndryshuar edhe destinacioni i stacionit – tani është në pjesën periferike të qytetit,” deklaroi Bulliqi.
Ai njoftoi se, krahas kësaj, në mandatin e ardhshëm do të vihet në funksion edhe trafiku urban në Podujevë, një kërkesë e kahershme e qytetarëve.
“Tashmë e kam përgatitur funksionalizimin e trafikut urban. Podujeva do ta ketë trafikun urban,” shtoi ai.
I pyetur pse nuk u bë funksionalizimi i trafikut urban gjatë këtij mandati, Bulliqi tha se prioritet ka qenë rregullimi i stacionit të autobusëve.
“Së pari më është dashur ta bëj stacionin, sepse siç ka qenë më herët, nuk mund tërhiqeshin linjat. Pastaj, për të funksionalizuar trafikun urban duhet edhe buxhet për të blerë autobusë të rinj,” u shpreh ai.
Sipas Bulliqit, mungesa e hapësirave të përshtatshme për stacion ka ardhur si pasojë e mosplanifikimeve të qeverisjeve të mëhershme.
“Nuk kam pasur mundësi tjetër për ta bërë stacionin diku tjetër, sepse ata që kanë qeverisur më herët nuk kanë menduar të krijojnë hapësira të reja. Besoj se jam kryetari i vetëm në nivel vendi që në këtë mandat kam shpronësuar 60 hektarë tokë për nevoja të shërbimeve komunale,” tha ai.
Lidhur me pyetjen nëse stacioni aktual është funksional, Bulliqi tha:
“Po, është funksional. Autobusët që vijnë nga Prishtina dhe të tjerët e shfrytëzojnë stacionin për t’u parkuar dhe për të marrë udhëtarë. Aktualisht, derisa të zgjidhet çështja e trafikut urban, kemi lejuar një linjë të hyjë deri në një pjesë të vogël të qytetit, për t’i afruar qytetarët më pranë qendrës.”
