Jeni nga ata njerëz që e kapin celularin sapo hapin sytë? Nëse kjo është rutina juaj e mëngjesit, mund të mendoni ta ndryshoni atë.
Gjithnjë e më shumë kërkime konfirmojnë se kjo nuk është mënyra më e mirë për të nisur ditën – në fakt, mund të ndikojë negativisht në shëndetin tuaj. Ja pse:
Mund të ngarkoheni në fillim të ditës
Në vend që të zgjohemi natyrshëm, kontrollimi i lajmeve, e-mail-eve ose mediave sociale mund të na përmbyt menjëherë me informacione, të cilat mund të harxhojnë energji dhe të ndikojnë negativisht në humor.
Hulumtimet psikologjike tregojnë se ekspozimi ndaj përmbajtjeve negative herët në mëngjes mund të zvogëlojë produktivitetin, kreativitetin dhe vetëbesimin, shkruan Best Life.
Bëhet zakon i dëmshëm
Ndonjëherë është në rregull të kontrolloni telefonin tuaj sapo zgjoheni, por nëse e bëni çdo ditë, mund të bëhet një zakon i dëmshëm.
Terapistja Maris Loeffler thekson se ekspozimi ndaj dritës natyrale sapo zgjohemi është një mënyrë shumë më e shëndetshme për të nisur ditën.
Mund të çrregullojë ritmin cirkadian
Përdorimi i telefonit para gjumit dihet tashmë si një zakon i keq, por e njëjta gjë vlen edhe për shikimin e përmbajtjeve që në mëngjes.
Hulumtimet nga Universiteti i Salzburgut tregojnë se drita e ekranit mund të prishë proceset natyrore të zgjimit dhe të ndikojë në cilësinë e gjumit.
Alarmet e celularëve mund të shkaktojnë stres
Tingulli i alarmit të telefonit inteligjent mund të shkaktojë një rritje të papritur të presionit të gjakut, gjë që mund të rrisë rrezikun e problemeve me zemrën, sipas një studimi nga Universiteti i Virxhinias. Ekspertët rekomandojnë zgjimin me tinguj më të butë ose dritë natyrale.
Përdorimi i celularit në mëngjes është i dëmshëm për sytë
Përdorimi i tepërt i ekranit mund të shkaktojë lodhje të syve dhe përdorimi i telefonit celular herët në mëngjes në dritë të ulët e përkeqëson më tej këtë problem, paralajmëron Shoqata Optometrike Amerikane.
Për një fillim më të mirë të ditës suaj, provoni të merrni pak ajër të pastër në mëngjes, të shijoni një mëngjes të shëndetshëm ose të paktën të kaloni disa minuta pa parë ekranin.
