Mbrëmjen e dy korrikut, u festua përvjetori i pavarësisë së Shteteve të Bashkuara të Amerikës në ambientet e ambasadës amerikane në Prishtinë.
Në këtë organizim, prezent ishte presidentja Osmani, por jo edhe kryeministri Kurti.
Arsyeja e mosprezencës së tij, sipas Qeverisë, ishte se Kurti ndodhej jashtë vendit.
“Kryeministri Kurti ka qenë i ftuar në organizimin e mbrëmshëm në ambasadën amerikane në shënimin e 248-vjetorin e pavarësisë së Shteteve të Bashkuara të Amerikës. Megjithatë, ai nuk ka mundur që të marrë pjesë dje për shkak se ka qenë jashtë vendit. Për këtë është njoftuar paraprakisht ambasada amerikane. Në organizimin e djeshëm kanë qenë të pranishëm dy zëvendëskryeministret e Qeverisë së Republikës së Kosovës, znj. Donika Gërvalla-Schëarz dhe znj. Emilia Rexhepi, krahas ministrave dhe zëvendësministrave të kabinetit qeveritar”, ka thënë zëdhënsi i Qeverisë, Përparim Kryeziu
Megjithatë, kjo shihet si justifikim.
“Të gjejë justifikime, kinse ka pasur agjendë, duke ditur që kur bënë ftesën një vend strategjik siç është ShBA, nuk besoj se një kryeministër që është pak më shumë serioz do ta ketë lëshuar këtë rast. Megjithëse bëhet fjalë për festë,por kur flasim për ShBA flasim për një vend që kemi interesa jashtëzakonisht të mëdha. Mendoj që qëllimisht Kurti e ka ngjeshur agjendën që të mos jetë prezent, më shumë për arsye personale”, vlerëson politologu Dritëro Arifi.
Madje, mosprezenca e Kurtit vlerësohet se shpërfaq ftohjen e raporteve nga ana e Qeverisë.
“T’ia jep një përgjigje tjetër SHBA-së për ato raportimet nga Departamenti Amerikan i Shtetit dhe Ambasada Amerikane, për dëmtim të raporteve Kosovë – ShBA, pra kjo ka të bëjë edhe me atë”, vlerëson Arifi.
Nga dita e djeshme, Kurti është duke u qëndruar në Tiranë.
