Partia Socialdemokrate përmes një aksioni simbolik para Kuvendit të Kosovës ka kundërshtuar rikthimin e Vjosa Osmani në Lidhjen Demokratike të Kosovës. Ata përmes një fotografie shfaqën Osmanin në “Kalin e Trojës”. Sipas kësaj partie, ish-presidentja po e përdorë LDK-në si “Kali i Trojës”.
Kryetari i PSD-së, Dardan Molliqaj tha se Vjosa Osmani nuk është kthyer në LDK vërtet, porse po e përdor atë si trampolinë për potencialisht ndonjë pozitë të ardhshme në institucionet e Kosovës.
“Kthimi që u trumbetua me të madhe i Vjosa Osmanit në LDK i ka dy probleme shumë të mëdha: E para është mashtrim i madh publik, sepse Vjosa Osmani nuk është kthyer fare në LDK. Vjosa Osmani po e përdor LDK-në si trampolinë për potencialisht ndonjë pozitë të ardhshme në institucionet e Kosovës. Qysh edhe u mor vesh sheshazi, ajo nuk është anëtare e LDK-së; e mori një grup prej nja 20 vetëve, po i fut në listën e LDK-së dhe po e ripërdor LDK-në edhe një herë. E dyta, ne besojmë që me këtë qasje, më shumë i shkon simbolika e kalit të Trojës, sepse LDK-ja më shumë se sa po bashkohet, po ndahet rishtazi”, tha Molliqaj.
Ndërsa për bashkimin mes Lumir Abdixhikut dhe Vjosa Osmanit, Molliqaj u shpreh se kjo është “lidhje puro e interest” për pozita të dy individëve.
Mes tjerash, ai theksoi se Kosova “vuan” për mungesë të opozitës dhe se qytetarët nuk duhet të rizgjedhë personat e njëjtë.
“Ky bashkim është lidhje puro e interesit për pozita të dy individëve që e kanë kapur këtë parti. Tash ju me të drejtë keni me pyet: “Po çka i intereson Partisë Socialdemokrate çështja e LDK-së?” Absolutisht na intereson. Kosova vuan që pesë vjet se s’ka opozitë. Kosova vuan nga njerëz të cilët, sa kanë qenë në institucione, i kanë shërbyer kryeministrit me pikë e me presje. Dhe Kosova nuk e ka luksin, Kosova nuk guxon dhe nuk duhet të rizgjedhë njerëz të cilët kanë plane vetëm për pozita të veta, madje duke mos i kursyer as për partitë e tyre. I kanë abuzuar, i kanë poshtëruar dhe po kthehen tamam me simbolikën sikurse kali i Trojës — e ju e dini çka i ndodhi Trojës kur u fut kali brenda”, theksoi Molliqaj.
Tutje, ai bëri thirrje tek qytetarët që t’i votojnë anëtarët e Partisë Socialdemokrate, të cilët sipas tij garojnë që vendit t’i bëjnë opozitë duke u shprehur optimist se gjashtë kandidatët e tyre bëjnë më shumë se deputetët aktual të opozitës.
“Ne garojmë për me kaluar pragun. Qytetarët mund të na votojnë edhe më shumë, por gara jonë është kjo garë — është e sinqertë, është sfidë e madhe. Ama unë jam i bindur që gjashtë kandidatët tanë bëjnë më shumë se secili kandidat i opozitës… Jam i vetëdijshëm që nuk kishim mundur me i bë 150 të tjerë. Ama ne gjashtë tanë i sfidojmë secilën gjashtëshe të secilës parti nëse do në bazë morale, ideore, të dijes, të guximit, të vetëmohimit”, potencoi ai.
I pyetur se pse kritikat e tyre janë orientuar tek opozita, e jo te Qeveria, Molliqaj potencoi se opozita po përlahet mes vete dhe sipas tij, nuk po e kryejnë funksionin e tyre si opozitarë.
“Kauza jonë është arsyeja pse ne e kritikojmë opozitën. Gjendja e opozitës është arsyeja. Këta të opozitës po merren qysh na po e kritikojmë opozitën e s’po e kritikojmë pushtetin. E çka janë duke bërë ata? Janë duke u përlarë mes vete, i keni parë grupet e interesit: kush është numër dy, kush është numër tre? Dhe mos harroni: LDK-ja po e shan PDK-në, PDK-ja po e shan LDK-në, AAK-ja po i shan të dyja, faleminderit. Ata problemin nuk e kanë pse ne po i kritikojmë. Problemi thelbësor është këtu: kritika jonë është e qëndrueshme. Çka po bëjmë ne për opozitën është e vërtetë”, përfundoi Molliqaj.
Fotografia, e cila shfaqte Vjosa Osmanin në kalin e Trojës u vendos para Teatrit Kombëtar.
