Qindra protestues marshuan të shtunën në rrugët qendrore të Venedikut për të shprehur kundërshtimin e tyre ndaj miliarderit Jeff Bezos, bashkëshortes së tij dhe luksit të tepruar që shoqëroi dasmën e tyre, tashmë në ditën e tretë dhe të fundit të festimeve të mbushura me personazhe të njohur dhe kritika nga banorët vendas.
Të premten, Jeff Bezos – personi i katërt më i pasur në botë – u martua me Lauren Sanchez në një ceremoni private në ishullin e qetë të San Giorgio-s, ku morën pjesë rreth 200 të ftuar të famshëm.
Megjithatë, kjo ngjarje shkaktoi zemërim tek shumë venecianë. Aktivistë dhe qytetarë e panë dasmën si simbol të shfrytëzimit të qytetit nga miliarderët, ndërkohë që banorët përballen çdo ditë me pasojat e mbingarkesës turistike, çmimet e papërballueshme të banesave dhe rreziqet e përmbytjeve të lidhura me ndryshimet klimatike.
Në mbrëmjen e së shtunës, ndërsa çifti përgatitej për festën përmbyllëse, qindra protestues – si nga Venediku ashtu edhe nga pjesë të tjera të Italisë – dolën në rrugë me pankarta ku shkruhej “Puthje Po, Bezos Jo” dhe “Jo Bezos, jo Luftë”.
Vlen të theksohet se qyteti ka rreth 50,000 banorë, të cilët ndihen gjithnjë e më të përjashtuar nga jeta kulturore dhe sociale e qytetit të tyre.
“Jemi këtu për të prishur planet e atyre që pasurohen duke shfrytëzuar të tjerët, ndërkohë që qyteti ynë po përballet me pasiguri të mëdha,” u shpreh një nga protestuesit, Martina Vergnano.
Sipas organizatorëve, protesta kishte ndikuar që festa e së shtunës të zhvendosej nga vendndodhja e saj fillestare, një ish-kantier detar mesjetar në zonën e Arsenale. ka shkruar AP.
Ndërkohë, Bezos dhuroi nga 1 milion euro secila për tre organizata kërkimore që merren me mbrojtjen e mjedisit në Venedik, sipas organizatës CORILA.
Por për shumë nga protestuesit, ky veprim u pa si një përpjekje për të qetësuar zemërimin e komunitetit lokal, më shumë sesa një gjest i sinqertë për ndihmë.
