Shumë qytetarë janë mbledhur në sheshin “Skënderbeu”, pranë hyrjes së Kuvendit të Republikës së Kosovës, ku po vazhdon protesta me kërkesën për miratimin e ndryshimeve në Ligjin për Dhomat e Specializuara.
Protestuesit po qëndrojnë para objektit të Kuvendit, duke kërkuar nga deputetët që plotësim-ndryshimet e ligjit të miratohen në lexim të dytë.
Ndërkohë, Policia e Kosovës ka shtuar praninë dhe masat e sigurisë përreth objektit të Kuvendit dhe institucioneve përreth.
Gjatë protestës, disa protestues kanë nisur të hedhin mjete piroteknike në drejtim të ndërtesës së Qeverisë së Kosovës. Një numër i mjeteve piroteknike kanë rënë edhe në afërsi të pjesëtarëve të Policisë së Kosovës.
Organizatorët e protestës u kanë bërë thirrje protestuesve që të mos hedhin mjete piroteknike në drejtim të policisë.
“Policia është e jona. Ne kemi dalë për të protestuar, jo me u përlesh me policinë. Forca jonë është zëri ynë”, ka thënë Çlirim Haziri.
