Autore: Jona Kelmendi
Me uniformat e tyre të punës, dhjetëra punëtorë teknikë të sektorit privat këtë të martë u mblodhën para administratës së Qendrës Klinike Universitare të Kosovës.
Aty dolën në protestë me një arsye të qartë, për të kërkuar paga më të larta.
E kjo protestë u organizua nga Federata Sindikale e Punëtorëve Teknikë të Sektorit Privat të Kosovës.
Ata kërkuan trajtim të barabartë me punonjësit e sektorit publik.
“Ne e lusim Qeverinë pse mu diskriminu sektori privat – publik na jemi të shqetësum pse mu diskriminu, se kur sektorit publik i rritet më 1 janar 55 euro e më 1 korrik 55 euro e me mbledh atë shumë është 110 euro kanë ngritje sektori publik e na sektori privat në të njëjtin vend punojmë. Edhe na e dojmë atë ngritje si sektori publik”, tha Hakif Sylejmani, kryetar i federatës.
E kryetari i Sindikatës së pavarur të sektorit privat, Jusuf Azemi kërkoi që muaji nëntor mos t’i zë punëtorët pa rritje pagash.
“Sot po e themi, diku mbi 20 komuna jemi në kohë proteste, në protestë të qetë të cilët po i paralajmërojmë se në momentin e kryerjes së zgjedhjeve komunale ne do t’i ndalim të gjitha punimet dhe unë e di që ky spital, kjo QKUK dhe institucionet tjera pa dorën e këtyre punëtorëve mbrapa që i kemi edhe të sigurimit edhe të pastrimit nuk mund të funksionojë, nuk kemi dëshirë që të vijmë deri te ai moment por megjithatë është një kërkesë imediate që fillimi i muajit nëntor nuk guxon të na nxë me këto paga dhe po i paralajmërojmë qysh nga maji”, tha Azemi.
Azemi gjithashtu thotë qe nëse kërkesat nuk merren parasysh, punëtorët janë të gatshëm të mos i ndalin protestat e grevat.
“Mjaft jemi shantazhuar, është koha jonë, është fuqia jonë, është organizimi jonë për të cilin ne nuk po i kërcënojmë. Ne i lusim ata që të ulen në bisedime përndryshe nuk kam dëshirë që në nivel të Kosovës ashtu siç sot po më vijnë informacionet e gjithë Kosova tek këta persona në një protestë të qetë që na ma tutje nuk mund të shkojmë ata të cilët janë të gatshëm për dialog jemi këtum ata të cilët nuk janë të gatshëm atëherë ne do të vazhdojmë me protesta e me greva ashtu siç ne dimë dhe mundemi”, tha ai.
Një kërkesë të tillë për rritje pagash, Sindikata e Punëtorëve të Sektorit Privat e kishte pasur ditë më parë edhe për punëtorët teknikë të Qendrës së Mjekësisë Familjare dhe të disa shkollave në Prishtinë.
