U mblodhën para Agjencisë së Ushqimit dhe Veterinarisë.
Inspektorët sanitarë të cilët ishin të angazhuar për zbatimin e masave anti-Covid, mëngjesin e së hënës protestuan para këtij institucioni.
Kërkesa e tyre është vazhdimi i kontratave të punës, shumicës së të cilëve iu ka skaduar më 1 qershor.
“Jemi 125 inspektorë sanitarë që jemi të angazhuar në luftën kundër covid 19, ku 85 na ka skadu kontrata më 1 qershor ndërsa pjesa tjetër deri me 15 qershor kanë kontratë. Dmth na kemi mbetë rreth vazhdimit ose mosvazhdimit të kontratave tona. Derisa ligji anti-Covid është ende në fuqi dhe ka masa ende që duhet të zbatohen”, tha Bekim Ahmeti, organizator i protestës.
Por nga Agjencia e Ushqimit dhe Veterinarisë thonë se gjithçka varet nga Ministria e Shëndetësisë, tek të cilët edhe do të paraqesin një kërkesë.
‘Drejtori I njoftojë se ne që do të paraqesim kërkese dhe varësisht prej vlershmit të Komitetit për pandemi dhe gjithçka tjetër varet nga autoritet tjera pra nga Ministria e Shëndetësisë, sepse ne si autoritet nuk kemi mundësi angazhimi direkt”, tha Lamir Thaçim, zëdhënës i AUV-it.
Megjithatë nga Ministria e Shëndetësisë, patën deklaruar se angazhimi i inspektorëve shtesë ishte paraparë në periudhën e pandemisë kur kishte më shumë raste dhe masa më të ashpra, teksa akoma nuk është marrë ndonjë vendim tjetër për ta.
Por, organizatori i protestës të së hënës Bekim Ahmeti, deklaroi se angazhimi i inspektorëve mund të bëhet edhe në fusha të tjera, krahas atyre të zbatimit të masave anti-covid.
Ndërkohë edhe nga Agjencia e Ushqimit dhe Veterinarisë, kanë shprehur nevojën për më shumë inspektorë.
Raporti i gazetares Doresa Geci.
