U mblodhën në sheshin e Prishtinës. Punëtorët e sektorit publik, mesditën e kësaj të premteje protestuan nën moton “Kryeministër realizo kërkesat tona! Parandalo grevën e përgjithshme!
E kërkesat pra qindra të pranishmëve i shpalosi udhëheqësi i Bashkimit të Sindikatave të Pavarura të Kosovës, Atdhe Hykolli.
“Jemi mbledhur këtu për t’ia përkujtuar partnerit tonë social qeverisë, se ne të punësuarit presim vëmendjen e tyre, punë e veprime dhe përmbushjen e premtimeve për të cilat i kemi zgjedhur. Mos na shpërfillni dhe hapnani derën e dialogut social. Shqetësimet tona janë reale, janë të përbashkëta, janë shqetësime të cilat njihni edhe ju. Kërkojmë hartimin si duhet por jo të ngadalësuar e të zvarritur të Projektligjit për paga që tashmë duhej të ishte miratuar dhe kësisoj do të rregullonte sistemin e pagave ashtu si duhet por mospërfillja dhe shpërfillja nuk ju lënë”, tha ai.
E ndryshe nga kreu i BSPK-së, po shprehet kreu i SBASHK-ut, Rrahman Jashari.
Sipas tij nuk ka hapësirë as për dialog.
“Qeveri, këta janë njerëzit tuaj. Është trup që të qëndroni në Amerikë e të mos dilni para këtyre njerëzve që presin në diell. Lutemi të këndelleni, në të kundërtën pas kësaj proteste madhështore do të ketë edhe veprime më të rënda të cilat ne nuk i duam, por si duket i doni. Ne e duam Ligjin e Pagave, por jo Ligj që na punon dikush, por që e punojmë edhe ne”, tha Jashari.
E një kërkesë të veçantë për Qeverinë pati kryetari i Sindikatës së Administratës Publike të Kosovës.
Policia e Kosovës ishte e mobilizuar që protesta të shkonte e qetë. Kështu që pas shprehjes së pakënaqësisë, të gjithë punëtorët shtetërorë u shpërndan të qetë.
Raporti i gazetares Valëza Sylejmani.
