Deputetja e zgjedhur nga Partia Demokratike e Kosovës, Eliza Hoxha ka thënë se nuk do të qëndrojë “duarkryq” sa i përket situatës me moskonstituimin e Kuvendit.
Ajo e pyetur në emisionin “Ditari” në Tëvë1 nëse do të organizohen edhe protesta, ka thënë se do të përdoren mjetet të ndryshme për ta bërë të ditur siç ka thënë ajo dënimin e shkaktuar nga mungesa e institucioneve.
“Në momentin që nuk kemi një institucion që mund të ushtrojmë punë tonë, ne duhet t’i përdorim të gjitha mjetet demokratike për ta bërë të ditur peshën negative të mosveprimit dhe moskonstituimit të Kuvendnit dhe pasojat që kjo i ka tashmë. Prandaj po, do të përdoren mjete të ndryshme, ku dhe si dhe çfarë, do të bëhen të dukshme në ditët në vijmë, por që nuk do të rrimë duarkryq”, ka thënë Hoxha.
Sa i përket mundësisë së dërgimit të një lënde në Gjykatën Kushtetuese për mos konstituimin e Kuvendit sipas afatit të dhënë nga Kushtetuesja, e që ishte deri më 7 gusht, Hoxha ka thënë se nuk kanë biseduar për këtë çështje.
Por ajo ka thënë se aktgjykimi i Gjykatës Kushtetuese për këtë çështje ekziston dhe sipas saj është i qartë.
“Gjykata Kushtetuese e ka dhënë një aktgjykim, nëse ne kërkojmë edhe njëherë Gjykatës Kushtetuese me interpretua aktgjykimin e vet , i cili është shumë i qartë, kjo është si mos me i besu Gjykatës Kushtetuese. Nëse ne tentojmë që Kushtetutën tonë në idenë e mirëbesimit dhe vullnetit politik, si me thanë ta përmbysim për të gjetur zbraztësira Kushtetutës për t’i interpretuar ato sa herë të na teket neve për egot tona personale kjo kërkund s’ka me qua”, ka thënë Hoxha.
Seanca konstituive e Kuvendit u ftua më 6 gusht, por kryetari i Lëvizjes Vetëvendosje, Albin Kurti nuk propozoi emër për kryeparlamnetar.
Ai tha se kërkon kohë për marrëveshje politike për presidentin duke shtuar se konstituimi i Kuvendit dhe votimi i Qeverisë pa një marrëveshje për presidentit shpie në zgjedhje të reja.
Ndërsa, vazhdimi i seancës u majtë edhe të shtunën, por që edhe kjo pati skenarin edhe përfundimin e njëjtë.
Kryesuesi i seancës Avni Dehari, si deputeti më në moshë nga radhët e LVV-së tha të martën se nuk do të ketë thirrje të seancës pas një marrëveshje.
Nga LVV vlerësojnë se nuk është shkelur Kushtetuta me moskonstituimin e Kuvendit më 7 gusht.
