Mëngjesin e një maji disa rrugë kryesore të Prishtinës u bllokuan.
Kjo pasi që punëtorët mbushën hapësirat publike për të protestuar në Ditën e Punëtorëve.
Qindra burra e gra u mblodhën para Bibliotekës Kombëtare.
E protestës i priu kryetari i Sindikatës së Bashkuar të Arsimit.
“Kërkesa bazë që e mbulon në një ombrellë të gjitha kërkesat e tjera është që Qeveria e Kosovës ti realizojë të gjitha kërkesat tona, të parandalojë veprimet tjera sindikale kjo është dhe kërkesat e tjera që janë normale, pra për kushtet e punës sepse në shkollat tona nuk janë të shekullit 21 dhe një kërkesë urgjente që qeveria mund ta realizojë së paku në qershor ku bëhet rishikimi i buxhetit për vlerën e koeficientit”, u shpreh Rrahman Jasharaj.
Protestës ju bashkëngjitën qindra mësimdhënës.
“Kemi ardh nga Gjilani jo vetëm që të protestojmë por dhe të kundërshtojmë kategorikisht kundër këtyre padrejtësive kriminale që po i bënë qeveria, shteti në krye me Albin Kurtin dhe servilët tjerë që i ka përreth për arsimin për mësimdhënësit”, thotë Naim Mehmeti, mësimdhënës.
“Kërkesat tona janë që të paguhet kujdestaria e ditës dhe ajo e klasës, sepse ka një angazhim të jashtëzakonshëm, është një përpjekje shumë e madhe në kujdestari, ki të bëjë shumë me nxënës, më prind, ka një angazhim të jashtëzakonshëm”, thotë mësimdhënësi Vehbi Mziu
Edhe kryetari i Sindikatës së Sektorit Privat, Jusuf Azemi foli para protestuesve.
“Kjo qeveri me gjithë kolegët që i kam prapa këtu para se të vij në pushtet na pati lodhur ky kryeministër, na grumbulloi në Grand duke u menduar se u bë mrekullia e zotit, ne prisnim që së paku diçka të realizojë. Dhe a din çfarë ka realizuar? Nëse kjo qeveri del dhe thotë që kam bërë diçka për punëtorët e sektorit privat të Kosovës, unë jap llogari. Tani zgjidhjen nuk po e kërkojmë nga qeveria, por zgjidhjen po e kërkojmë te liberalizimi i vizave me të cilën nëse vazhdon kështu edhe një vit, kryeministrin e Kosovës nuk do të ketë kush ta bart me xhipat e zi, sepse ka me mbet vetëm”, tha Azemi.
“Kërkojmë të ngritët vlera e koeficientit”, “Duam dialog social”, “Qeveri respekto pensionistët”, kanë qenë disa nga thirrjet e mbishkrimet në pankarta të protestuesve.
