Disa familje që ndodhen aktualisht në Shëngjin, një qytet 70 kilometra në veriperëndim të Tiranës, i bënë thirrje autoriteteve që të përshpejtojnë procesin e transferimit të tyre për në SHBA.
Me pankarta në duar ata kanë thënë se janë harruar nga autoritetet dhe nuk kanë asnjë sqarim për të ardhmen e tyre edhe pse kanë kërkuar edhe vetë të ikin nga Shqipëria. Rreth 2400 afganë u evakuuan në Shqipëri në gusht dhe shtator të vitit 2021, pas ardhjes në pushtet të talibanëve, dhe iu dha strehim i përkohshëm në Shëngjin dhe në hotele të tjera në Durrës.
348 afganë që janë strehuar përkohësisht në një resort në Shëngjin protestuan pasi administratori i ambienteve ku po qëndrojnë u ka kërkuar që të largohen.
Shkak është bërë mungesa e pagesës nga ana e një prej shoqatave që financon qëndrimin e tyre në Shqipëri.
SHBA-ja dhe organizatat jo qeveritare ofruan mbështetje financiare për akomodimin e tyre.
Bledar Shima, menaxheri i një resorti në Shëngjin që strehon 350 afganë, tha se prona nuk është paguar për gjashtë muaj. Shima i kërkoi qeverisë shqiptare të ndërhynte për t’i dhënë zgjidhje kësaj situate.
Qeveria shqiptare ka thënë gjatë kohës kur këta afganë kanë arritur në Shqipëri se do të strehonte mijëra afganë për të paktën një vit përpara se të transferoheshin përfundimisht në Shtetet e Bashkuara.
Kohët e fundit, qeveria u zotua t’i mbajë refugjatët për më shumë se një vit nëse vonohen vizat e tyre për në SHBA.
Ministria e Jashtme e Shqipërisë deklaron se nëntëqind nga të evakuuarit nga Afganistani mbeten në Shqipëri. Pjesa tjetër janë larguar tashmë për në Amerikë dhe Kanada. /REL
