Kryeministri izraelit Benjamin Netanyahu i ka kërkuar Presidentit Isaac Herzog falje për rastet e korrupsionit me të cilat përballet, pa pranuar fajin paraprakisht.
Zyra e presidentit tha se Herzog do të konsultohet me zyrtarë të drejtësisë përpara shqyrtimit të kërkesës, “e cila mbart me vete implikime të rëndësishme”.
Netanyahu, i gjykuar prej pesë vitesh për ryshfet, mashtrim dhe shkelje të besimit – akuza që ai i mohon – deklaroi në një mesazh video se çështjet kundër tij po dështonin, por se procesi po e copëtonte Izraelin nga brenda, citon BBC.
Opozita izraelite kërkon që ai të pranojë fajin para se të kërkojë falje.
Presidenti i SHBA-së Donald Trump më herët i kishte kërkuar Herzogut ta “falte plotësisht” Netanyahun, por presidenti izraelit ishte shprehur se kërkohet një kërkesë zyrtare.
Të dielën, zyra e tij publikoi kërkesën dhe një letër nga Netanyahu, duke theksuar “rëndësinë e kësaj kërkese të jashtëzakonshme dhe implikimet e saj”. Nuk ka ende një afat për vendimin e presidentit.
Ndërkohë, dhjetëra izraelitë protestuan pranë shtëpisë së Herzogut në Tel Aviv për të kundërshtuar kërkesën për falje.
Sipas The Times of Israel, protestës iu bashkuan edhe ligjvënës të opozitës, përfshirë Naama Lazimin.
Demonstruesit mbanin pankarta ku e fajësonin Netanyahun për krizën politike dhe brohorisnin: “Ti je udhëheqësi; ti je fajtori”.
Një protestues ishte veshur me maskën e Netanyahut dhe një kostum portokalli të stilit të burgut.
Protesta u zhvillua nën sloganin “Falje = Banana Republic”. Reagimet politike u shtuan pasi Netanyahu kërkoi t’i jepet fund gjyqit të tij disavjeçar.
Udhëheqësi i opozitës, Yair Lapid, i ka kërkuar Herzogut të mos japë falje pa një pranim faji dhe tërheqje nga politika.
