Mërzia shihej në sytë e tij.
Është ky Murat Loku, invalid i luftës, që të premten doli në protestën gjithëpopullore në Prishtinë.
Krejt kjo, pas aktgjykimit dënues ndaj ish-katërshes së UÇK-së në Hagë.
Loku thotë se kishte pritur që 16 shtatori të sillte gëzim dhe lirimin e tyre.
“Shumë rëndë në vend se me u gjyku kriminelët gjykohen çlirimtarët. Ne kemi çliru, nuk kemi bo gjenocid, nuk kemi bo masakra, as s’kemi uzurpu vende, as kurgjo hiç, po sllavizmi gjithmonë e ka bo këto”, tha Murat Loku.
E si ky ish-ushtar i UCK-së, në sheshin “Skënderbeu” në Prishtinë, për të protestuar dolën edhe shumë qytetarë të tjerë.
Të gjithë këta, kërkuan drejtësi për ish-krerët e UÇK-së.
“Jemi dal sot për të drejtat e çlirimtarëve, për lirinë e atyre që luftuan për neve në luftë dhe e fituan luftën, e sot luftojnë për pavarësinë tonë. Që dojnë me na shkelë me dy këmbë kriminelët e Gjykatës Speciale”, tha Minitr Ahmeti, protestuese.
E nuk munguan as kërkesat për zhbërjen e Gjykatës Speciale.
“Ne duhet të punojmë që ta zhbëjmë këtë gjykatë ose fundi i fundit le t’ia ndalim financat, shteti i Kosovës Gjykatës Speciale, edhe mbaron puna”, tha Fixhir Asipi.
Se kërkesat për lirim nuk do të ndalën, e thonë disa protestues të tjerë.
“Na po dalim për me ditë edhe Evropa e krejt për me leshu Hashim Thaçin dhe ata tjerët. Tash ishalla i lëshojnë ose duhet me kallë krejt në tana anët ose s’kemi çka me bo”, deklaroi Abaz Qelaj.
“Deri në minutën e fundit, sa të kemi frymë, kemi me dalë në protestë për ta. Edhe jam në gjendje edhe jetën me dhanë për Hashim Thaçin, për të gjithë”, tha ai.
E disa qytetarë ngritën shqetësim edhe për praninë e personave me maska në protestë.
“Ata të cilët dalin me maska, sipas mendimit tem, të gjithë janë fajtorë. Nuk ban me ardhë me maskë. Pse më ngjitë maskë? Në qoftë se ngjesh maskë, i bjen që kam ardhë me të dëmtu ty”, theksoi Fatmir Morina.
Protesta gjithëpopullore në Prishtinë zgjati një orë.
Ndërsa u thirr nga organizatat e dala nga lufta pasi Hashim Thaçi, Kadri Veseli, Jakup Krasniqi dhe Rexhep Selimi, u dënuan në total me 81 vjet burgim, në Dhomat e Specializuara në Hagë.
