Protesta u mbajtën në të gjithë Gjermaninë, të dielën për një mocion jodetyrues të propozuar në parlament që bën thirrje që vendi të kthejë më shumë emigrantë në kufijtë e tij, e i cili u miratua nga partitë e Bashkimit Kristian Demokrat (CDU), Bashkimi Kristian Social (CSU) dhe i mbështetur nga partia e djathtë Alternativa për Gjermaninë (AfD).
Rreth 200,000 njerëz u mblodhën në kryeqytetin e Gjermanisë, Berlin, ndërsa 15,000 protestuan në qytetin e Saarbrucken dhe 14,000 në Kiel kundër CDU/CSU.
Protestuesit në Berlin u mblodhën te Porta e Brandenburgut dhe marshuan drejt selisë së CDU për të shprehur kundërshtimin e tyre ndaj bashkëpunimit me partinë AfD, raporton AA.
Duke mbajtur mbishkrime dhe pankarta, pjesëmarrësit në demonstratën, e cila u organizua nën sloganin “Kryengritja e njerëzve të mirë – Ne jemi muri i sigurisë”, shprehën mosmiratimin e tyre.
Disa nga pankartat i referoheshin epokës nacionalsocialiste me sloganin “5 deri në 1933” të shkruar mbi to, me gjasë duke iu referuar periudhës së rritjes së Partisë Naziste dhe konsolidimit të pushtetit në Gjermani që çoi në emërimin e Adolf Hitlerit si kancelar në 1933.
Michel Friedman, i cili dha dorëheqjen nga CDU për shkak të bashkëpunimit të saj me AfD, kritikoi qëndrimin e partisë gjatë fjalimit të tij në protestë.
Ai iu referua AfD si “partia e urrejtjes, një parti që nuk qëndron në terrenin e demokracisë”.
Ai theksoi se asnjëherë nuk duhet bashkuar forcat me ata që shkelin dinjitetin njerëzor.
Propozimi për shtrëngimin e ligjeve të migracionit, i paraqitur nga CDU/CSU në parlament më 29 janar, u miratua me mbështetjen e AfD.
