Komuna e Prishtinës ka njoftuar qytetarët se të enjten (29 maj) disa nga hyrjet kryesore të Prishtinës do të jenë të mbyllura përkohësisht për shkak të protestës së komunitetit të bizneseve të paralajmëruar nga Oda Ekonomike e Kosovës.
Në njoftim bëhet e ditur se zonat që do të preken nga bllokimi janë hyrja nga Veterniku dhe Gjilani, ajo nga Fushë-Kosova dhe Mitrovica, si dhe hyrja nga Podujeva në “Kodrën e Trimave”
Ju njoftojmë se nesër, më 29 maj 2025 (e enjte), disa nga hyrjet kryesore të Prishtinës do të jenë të mbyllura përkohësisht, si pasojë e një proteste të paralajmëruar nga Oda Ekonomike e Kosovës. Protesta do të zhvillohet nga ora 10:00 deri në ora 12:00, si shenjë kundërshtimi ndaj procesit të liberalizimit të tregut të energjisë elektrike, i cili pritet të hyjë në fuqi më 1 qershor 2025. Zonat që do të preken nga bllokimi janë hyrja nga Veterniku dhe Gjilani, përfshirë rrugën pranë Albi Mall dhe pjesën poshtë Veternikut (akseset nga Ferizaj, Gjilan dhe Aeroporti), hyrja nga Fushë-Kosova dhe Mitrovica, konkretisht në rrethin e Madh te Lakrishtja (Dukagjini Toëer), hyrja nga Podujeva, në lagjen Vranjevc – përfshirë zonën te ish-Humanisti dhe udhëkryqin pranë bankës Raiffeisen (bllokohet qasja në drejtim të Podujevës dhe nga Dragodani drejt Shkabaj/Orlloviqit). Automjetet e bizneseve pjesëmarrëse do të pozicionohen në rrugë, duke pamundësuar përkohësisht qarkullimin në këto segmente”, thuhet në njoftim.
Komuna u ka sugjeruar qytetarëve planifikim alternativ të lëvizjeve gjatë kohës së protestës.
“Lusim qytetarët për mirëkuptim dhe sugjerojmë planifikim alternativ të lëvizjeve gjatë kohës së protestës. Institucionet e Kryeqytetit janë në komunikim të vazhdueshëm me autoritetet përkatëse për të garantuar sigurinë publike dhe menaxhimin sa më efikas të situatës.Faleminderit për mirëkuptimin tuaj”, theksohet në fund të njoftimit.
Protesta e komunitetit të bizneseve do të zhvillohet nga ora 10:00 deri në ora 12:00, si shenjë kundërshtimi ndaj procesit të liberalizimit të tregut të energjisë elektrike, i cili pritet të hyjë në fuqi më 1 qershor 2025./teve1.info/
