Propozimin për qeveri tranzicionale, kryetari i Lidhjes Demokratike të Kosovës e mbrojti përmes një plani 15 pikësh.
Abdixhiku tha se Qeveria e Unitetit Kombëtar do të ishte zgjidhja më e mirë për 10 muaj qeverisje nga të gjitha partitë politike.
Megjithatë, profesori universitar, Avdi Smajljaj vlerëson se përmbajtja e planit të LDK-së nuk do të jetë e pranueshme nga subjektet tjera.
“Edhe për vetë faktin që partitë nuk po mund të merren vesh për një pikë shumë të thjeshtë teknike siç është çështja e kryeparlamentarit e si mund të mirren me çështje që kërkojnë angazhim gjithëkombëtar do të thoja në afatgjatë, afatmesëm, afatshkurt, kërkojnë një integrim të gjerë të grupeve të interesit, të shoqërisë civile, të palëve të interesuara për të filluar hartimin e një strategjie të atyre pikave”, thotë Smajljaj.
Sipas tij, fushat e përmendura në programin e Abdixhikut kërkojnë trajtim të menjëhershëm nga institucionet.
“Ky trajtim fillimisht kërkon konsensusin e partive politike i cili është i paarritshëm, me këto parti politike në këtë gjendje që janë në këtë nivel polarizimi është consensus i paarritshëm. Pastaj koha përmes së cilës mund të realizohen këto është pothuajse e pa mundur në njëfarë mënyre. Dhe kjo është më shumë njëfar përpjekje në një lloj mënyre për ta menaxhuar kohën deri në zgjedhjet e ardhshme, nëse duhet shkuar në zgjedhje të parakohsme pas 10 muajsh atëherë le të shkojnë tani”, shprehet Smajljaj.
Ndërsa njohësi i Kushtetutës, Mazllum Baraliu e mirëpriti këtë propozim duke shtuar se nuk parashihet asnjë pengesë në realizimin e saj.
“Kushtetuta e parasheh si duhet, tanimë ne jemi në një situatë të jashtëzakonshme, në një krizë të thellë. Thjeshtë marrëveshjet politike bëjnë ujdinë dhe godinën e ndërtojnë, pra marrëveshjen dhe kjo nuk është kundërkushtetuese dhe nuk është kundërligjore përkundrazi është vullnet politik dhe këtë mund ta bëjnë edhe përmes Kuvendit më së miri dhe natyrisht që në Kuvend miratohet në radhë të parë zgjedhet kryetari, nënkryetari, konstituohet Kuvendi dhe mandej Qeveria me marrëveshje”, thotë Baraliu.
Nga 15 prilli, partitë nuk kanë gjetur gjuhë të përbashkët për konstituimin e Kuvendit të Kosovës, si hap i parë për formimin e institucioneve të reja.
