Propozimi i SHBA-së për për armëpushim 60-ditor në Gaza ndër të tjera parashikon lirimin e 10 pengjeve izraelite dhe kthimin e mbetjeve mortore të 18 të tjerëve në pesë faza.
Nëse miratohet,njëri nga kushtet është edhe që Hamasi nuk do të mbajë ceremoni publike. Në këmbim të kësaj, ai do të përfitojë garanci amerikane për vazhdimin e armëpushimit gjatë negociatave.
Propozimi përfshin gjithashtu tërheqje graduale të ushtrisë izraelite nga Gaza, çështje që pritet të nxisë debat në Izrael.
Nëse Hamasi e pranon, negociatat do të fillojnë së shpejti në Katar ose Egjipt. Netanyahu pritet të vizitojë SHBA-në javën tjetër, me shpresën për një përparim diplomatik, ka raportuar Anadoly.
Të mërkurën, Hamasi konfirmoi se po shqyrtonte propozimet e paraqitura nga ndërmjetësit që synojnë arritjen e një marrëveshjeje që përfshin një armëpushim, tërheqjen e Izraelit nga Gaza dhe ndihmë humanitare për palestinezët.
Grupi palestinez ka deklaruar vazhdimisht gatishmërinë e tij për të liruar të gjithë pengjet izraelite në këmbim të përfundimit të fushatës ushtarake të Izraelit dhe një tërheqjeje të plotë nga Gaza.
Megjithatë, kryeministri izraelit Benjamin Netanyahu i ka rezistuar një marrëveshjeje gjithëpërfshirëse, duke kërkuar në vend të kësaj marrëveshje të kufizuara që do të lejonin vazhdimin e luftës.
Ndërkohë, viktimat në Gaza vazhdojnë të rriten, me mbi 57,000 palestinezë të vrarë që nga tetori 2023.
Izraeli poashtu përballet me akuza për gjenocid në Gjykatën Ndërkombëtare të Drejtësisë.
