Prokurorja e rastit, Valbona Disha-Haxhosaj thotë se edhe pse ekspertiza nuk e vërteton faktin se Donjeta Pajazitaj ishte dhunuar kjo sipas saj vërtetohet nga pozita e detyruar siç ka qenë në atë moment gjysmë e zhveshur viktima, shkruan teve1.info.
“Edhe pse ekspertiza nuk e vërteton faktin se ajo ishte e dhunuar për shkak të kallëzimit pasi që në të u gjetën algat e gjeneratës së dytë, por që ajo ishte e dhunuar vërtetohet nga pozita që ajo ka qenë në momentin e vrasjes. Siç e ka thënë eksperti, ajo ka qenë në pozitën e detyruar, dhe rripi i pantallonave të Donjetës ka qenë i zbërthyer, pantallonat dhe të brendshmet kane qenë të zhveshura deri nen gjunjë” ka deklaruar prokurorja e rastit gjatë seancës.
Ndërsa lidhur me rastin, në mungesë të provave, mbrojtja ka kërkuar që Naser Pajazitaj të lirohet.
Nga ana tjetër avokati Gëzim Kollcaku deklaroi se pasi në vendin e ngjarjes ku është vrarë Donjeta Pajazitaj nuk është gjetur asnjë gëzhojë sipas tij kjo e vërteton faktin se ajo është ekzekutuar diku tjetër.
“Në vendin e ngjarjes nuk është gjetur asnjë gëzhojë, kjo vërteton se Donjeta nuk është ekzekutuar atje, që domethënë ajo është ekzekutuar diku tjetër e pastaj është sjellë aty”, ka thënë Kollcaku.
Donjeta Pajazitaj është gjetur e vrarë në bjeshkët e Strellcit të Deçanit në vitin 2015.
Gjykata Themelore në Pejë, në mars të vitit 2019 e kishte shpallur fajtor të akuzuarin Naser Pajazitaj dhe e kishte dënuar me burgim të përjetshëm. Dënim ky që ishte vërtetuar edhe nga Gjykata e Apelit në korrik të vitit 2019.
Por, në nëntor të vitit 2019, Gjykata Supreme i kishte prishur të dy aktgjykimet dhe lëndën e kishte kthyer në rigjykim./Teve1.info/
