Prokuroria Themelore në Ferizaj ka bërë të ditur se ka nisur hetime për dyshime të keqpërdorimit të votave gjatë procesit të numërimit në disa komuna të rajonit.
Sipas njoftimit të Sistemit Prokurorial, më 22 janar 2026 Policia e Kosovës është autorizuar të ndërmarrë të gjitha veprimet hetimore lidhur me manipulime të dyshuara të votave për kandidatë për deputet të Kuvendit të Kosovës, me qëllim të sigurimit të provave dhe identifikimit të personave përgjegjës në komunat që bien nën kompetencën territoriale të kësaj prokurorie.
Në komunën e Ferizajt, bazuar në raportet nga 153 vendvotime, keqpërdorimet e evidentuara janë në një përqindje të ulët. S
ipas të dhënave, vetëm një kandidat ka pasur shtim prej shtatë votash, ndërsa për kandidatët e tjerë shtimi ka qenë nga një deri në tre vota.
Edhe në komunën e Hanit të Elezit, përqindja e manipulimeve është e ulët dhe e ngjashme me atë të Ferizajt.
Ndërkohë, në komunën e Shtimes janë identifikuar manipulime në tri qendra votimi, me një përqindje më të lartë. Sipas gjetjeve, është konstatuar shtim i votave për tre kandidatë, në numër që varion nga dhjetë deri në dyzet e pesë vota.
Në lidhje me këto raste, Policia e Kosovës është autorizuar të intervistojë kryesuesit e qendrave të numërimit në komunat e Ferizajt dhe Hanit të Elezit, ndërsa në Shtime do të intervistohen komisionerët dhe kryesuesit në cilësinë e të dyshuarve.
Sa i përket komunave të Kaçanikut dhe Shtërpcës, Prokuroria ka njoftuar se ende është në pritje të raporteve përfundimtare nga Policia e Kosovës.
