Përmes një njoftimi për media nga Prokuroria kanë bërë të ditur se motivet për këtë ngjarje ende nuk dihen dhe të dyshuarit lidhur me këtë rast gjenden në arrati.
“Ferizaj, 10 Maj 2022– Prokuroria Themelore në Ferizaj, Departamenti për Krime të Rënda, ju njofton se gjatë ditës së sotme, rreth orës 14:00, në Kaçanik, një person është privuar nga jeta dhe një person tjetër ka mbetur i lënduar si pasojë e të shtënave me armë. Motivet për këtë ngjarje ende nuk dihen dhe të dyshuarit lidhur me këtë rast gjenden në arrati, për shkak të dyshimit se kanë kryer veprën penale ‘Vrasja e rëndë’ të Kodit Penal të Republikës së Kosovës”, thuhet në njoftim.
Sipas Prokurorisë, trupi i pajetë i viktimës është dërguar për obduksion, ndërsa personi tjetër i lënduar është dërguar në QKUK për trajtim.
“Me urdhër të prokurorit, trupi i pa jetë i viktimës është dërguar për obduksion, në Institutin e Mjekësisë Ligjore, ndërsa, personi tjetër i lënduar është dërguar në Qendrën Klinike Universitare të Kosovës (QKUK) për trajtim të mëtutjeshëm mjekësor. Prokuroria Themelore në Ferizaj, në bashkëpunim me Policinë e Kosovës janë duke ndërmarrë të gjitha veprimet e nevojshme hetimore dhe janë duke punuar rreth zbardhjes së rrethanave të ngjarjes”, thuhet më tej në njoftimin e Prokurorisë.
Ndërkaq, nga PK-ja kanë thënë se personi që ka ndërruar jetë është i moshës 30-vjeçare, ndërsa personi i dytë i lënduar është i moshës 32-vjeçare. /teve1.info/
