Prokuroria Speciale e Republikës së Kosovës ka ngritur aktakuzë ndaj dy personave, M.M. dhe A.B., për veprën penale “Nxitje të përçarjes dhe mosdurimit”.
Sipas aktakuzës, të pandehurit akuzohen se kanë nxitur dhe përhapur publikisht urrejtje dhe mosdurim midis grupeve fetare, si dhe kanë propaganduar ideologji ekstremiste fetare, duke përdorur metoda të ngjashme me propagandën e organizatës terroriste ISIS.
Në dokumentin e Prokurorisë thuhet se M.M. ka bërë thirrje për masakra ndaj hebrenjve dhe të krishterëve, duke publikuar në rrjetin social “Facebook” foto dhe video të personave të radikalizuar, si dhe mesazhe që nxisin ekstremizmin fetar.
Ndërsa A.B. akuzohet se ka bërë thirrje për zbatimin e ligjeve të “Sheriatit” dhe kundërshtimin e sistemit demokratik, simboleve shtetërore dhe ligjeve të Republikës së Kosovës. Sipas aktakuzës, nga viti 2019 deri më 22 maj 2025, A.B., në profilin e tij në Facebook me emrin “Ubejdullah Abu Suhejla”, ka shpërndarë materiale nxitëse dhe ka bërë thirrje për t’iu bashkuar luftës për xhihad.
“Prokuroria Speciale riafirmon përkushtimin e saj në ndjekjen dhe hetimin e këtyre veprave penale, të cilat cenojnë rëndë vlerat demokratike dhe bashkëjetesën mes grupeve etnike dhe fetare që jetojnë në Republikën e Kosovës”, thuhet në njoftimin zyrtar.
