Prokuroria Speciale ka njoftuar se, sot është duke e intervistuar Ridvan Muharremin, në cilësinë e të pandehurit për një çështje penale, të cilën e ka në hetim.
Sipas njoftimit, Muharremi është paraqitur për intervistim me ftesë të kësaj Prokurorie.
“Prokuroria Speciale informon se sot, Ridvan Muharremi, është paraqitur në Prokurorinë Speciale me ftesë të kësaj prokurorie. I njëjti është duke u intervistuar në cilësinë e të pandehurit për një çështje penale, të cilën kjo prokurori e ka në hetim”, thuhet në njoftim.
Ridvan Muharremi, dyshohet se është ndërmjetësues i marrëveshjes ndërmjet Kosovës dhe firmës nga Polonia, e cila s’i ka sjellë rezervat në Kosovë, pavarësisht pagesës që është kryer nga ministria e Rozeta Hajdarit.
Ai është arrestuar nga Policia e Kosovës, me 18 gusht të vitit 2023, pas një aksioni të zhvilluar në shtëpinë dhe lokalin e tij.
Lidhur me rastin, avokati i tij, Mahmut Halimi, kishte thënë se klienti i tij ishte i përfshirë në blerjen e rezervave shtetërore nga ministrja, Rozeta Hajdari.
Ndërsa, ministrja Hajdari, kishte deklaruar se nuk ka njohuri dhe nuk e ka parë askund nëpër dokumente emrin e Ridvan Muharremit.
Për skandalin me rezervat shtetërore, ishin arrestuar edhe dy zyrtarë të Ministrisë së Industrisë, Ndërmarrësisë dhe Tregtisë, Hafiz Gara e Irfan Lipovica, për të cilët, ministrja Hajdari, kishte thënë se janë të pafajshëm dhe se nuk kanë bërë kurrfarë shkeljesh ligjore derisa ka akuzuar Policinë se ka marrë kundërligjshëm dokumentet e rezervës shtetërore, duke rrezikuar kështu sigurinë kombëtare.
Ridvan Muharremi dhe dy të zyrtarët e MINT ishin liruar nga paraburgimi më 31 gusht 2023./teve1.info/
