Prokuroria e Shtetit ka nisur hetimet lidhur me një fletëvotim të dyshimtë të gjetur në Qendrën e Numërimit dhe Rezultateve (QNR).
Sipas raportimeve në media, fletëvotimi i dyshuar, i cili thuhet se përmbante votë për Listën Serbe, dyshohet të ketë qenë fotokopje, duke ngritur dyshime për manipulim të procesit zgjedhor dhe fenomenin e njohur si “treni bullgar”.
Pas evidentimit të rastit, hetuesit kanë dalë në QNR dhe kanë ndërmarrë veprimet e para hetimore, përfshirë marrjen e dëshmive dhe verifikimin e rrethanave të ngjarjes.
Lidhur me rastin, Tëvë1 ka kontaktuar me zëdhënësen e Prokurorisë Themelore në Prishtinë, Kaltrina Shala, e cila ka konfirmuar inicimin e rastit dhe sekuestrimin e fletëvotimit të dyshuar.
“Lidhur me pyetjen tuaj, e konfirmojmë që Prokurori i Shtetit ka iniciuar rastin ‘Keqpërdorimi i të drejtës së votimit’, nga neni 213 i Kodit Penal të Republikës së Kosovës. Gjithashtu, me urdhër të Prokurorit të Shtetit, është sekuestruar edhe fletëvotimi me të cilin dyshohet në drejtim të veprës penale ‘Keqpërdorimi i të drejtës së votimit’ sipas nenit 213 të KPRK-së. Ndërkohë, Prokurori i Shtetit, në bashkëpunim të plotë me Policinë e Kosovës, po ndërmarrin të gjitha veprimet e nevojshme hetimore në lidhje me këtë çështje”, ka deklaruar Shala për Tëvë1.
