Lajmin për teve1.info e ka konfirmuar, zëdhënësja e Prokurorisë Themelore në Prishtinë, Laureta Ulaj.
Ajo ka thënë se rasti është nën fazën e hetimeve.
“Referuar pyetjeve tuaja, lidhur me kallëzimin penal kundër D.G., në drejtim të veprës penale ‘Mos raportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare’, iu njoftojmë se rasti është në fazën e hetimeve” ka thënë Ulaj për teve1.info
Ndryshe, Agjencia Kundër Korrupsionit ka konfirmuar se ekziston dyshimi i arsyeshëm për vepër penale të natyrës korruptive ndaj ministres së Punëve të Jashtme, Donika Gërvalla.
Ministrja e Jashtme dhe Diasporës, Donika Gërvalla nuk ka deklaruar dy pozita, një në biznesin e saj në Gjermani dhe tjetrin në një OJQ në Kosovë dhe as nuk ka treguar për pasurinë e burrit dhe fëmijëve të saj në deklarimin që ka bërë në Agjencinë Kundër Korrupsionit (AKK).
Në deklarimin e pasurisë që e ka bërë më 22 prill të vitit të kaluar në Agjencinë Kundër Korrupsionit, Gërvalla kishte njoftuar vetëm funksionin e Ministres së Punëve të Jashtme dhe Diasporës dhe zëvendëskryeministres./teve1.info
