Prokuroria Speciale e Kosovës ka konfirmuar se ka dorëzuar aktakuzë në Gjykatën Themelore në Prishtinë, ndaj ministres në detyrë, Rozeta Hajdari, drejtorit të Divizionit për Rezervat Shtetërore të Mallrave, Hafiz Gara si dhe drejtorit të Departamentit për Integrim Evropian dhe Koordinim të Politikave, Irfan Lipovica nën dyshimin për kryerjen e veprave penale “Keqpërdorimi i pozitës apo autoritetit zyrtar” dhe “Zbulimi i fshehtësisë zyrtare”.
Në njoftim thuhet gjithashtu se aktakuzë është ngritur edhe ndaj Ridvan Muharremit, nën dyshimin për kryerjen e veprës penale “Ndihma në kryerjen e veprës penale të keqpërdorimit të pozitës apo autoritetit zyrtar”.
“Të pandehurit R.H., I.L. dhe H.G., akuzohen se gjatë muajve shkurt – mars të vitit 2022, Në bashkëkryerje, kanë keqpërdorur detyrat zyrtare me qëllim përfitimi pasuror për persona të tjerë dhe shkaktimi të dëmit ndaj buxhetit të Republikës së Kosovës”, thuhet në njoftim.
Sipas Prokurorisë, si rezultat i veprimeve të të pandehurve, buxhetit të shtetit i është shkaktuar dëm prej 2 milionë e 912 mijë e 134 euro.
Gjithashtu, të pandehurit R.H., I.L. dhe H.G. akuzohen se pa autorizim kanë zbuluar fshehtësinë zyrtare.
“Edhe pse kanë qenë në dijeni se vendndodhja e rezervave shtetërore përbën sekret shtetëror, sipas Ligjit për Rezervat Shtetërore të Mallrave, ata me dashje ia kanë vënë në dispozicion këtë informacion të pandehurit R.M. Ndërkaq, i pandehuri R.M. akuzohet se u ka krijuar kushte të tjerëve për kryerjen e veprës penale, duke ndërmjetësuar dhe negociuar drejtpërdrejt, si dhe duke propozuar e rekomanduar përzgjedhjen e operatorëve ekonomikë në emër të rezervave shtetërore”, theksohet në njoftim.
Paraprakisht lajmin e ka konfirmuar vetë ministrja Hajdari përmes një postimi në Facebook, ku bëri të ditur se është informuar nga avokati i saj për dorëzimin e aktakuzës në Gjykatën Themelore të Prishtinës.
Ngrihet aktakuzë ndaj Rozeta Hajdarit për rastin e rezervave shtetërore
