Prokuroria Themelore në Prizren ka paraqitur kërkesë në Gjykatën Themelore të këtij qyteti për caktimin e masës së paraburgimit prej 30 ditësh ndaj të dyshuarës Shpresa Osmanollaj, zyrtare komunale në Drejtorinë e Urbanizmit dhe Planifikimit Hapësinor, e cila aktualisht ndodhet në ndalim 48 orësh.
Zyrtarja e Urbanizmit në Komunën e Prizrenit, Shpresa Osmanollaj ishte ndaluar të enjten për 48 orë me aktvendim të Prokurorisë Themelore në Prizren.
Osmanollaj dyshohet për kryerjen e veprës penale “Keqpërdorim i detyrës zyrtare”.
Ndalimi i saj është bërë pas transmetimi të hulumtimit të “Betimi për Drejtësi” me titull “Loja me numra për fitimin e lejeve ndërtimore”.
Sipas Prokurorisë, ekziston dyshimi i bazuar se Osmanollaj ka kryer veprën penale “Keqpërdorimi i pozitës apo autoritetit zyrtar”, sipas nenit 414 të Kodit Penal të Republikës së Kosovës.
Hetimet paraprake tregojnë se më 25 shtator 2024, në cilësinë e kryetares së komisionit për pranimin teknik të një objekti banesor në rrugën “William Walker” në Prizren, e dyshuara ka lëshuar certifikatën për përdorim të objektit në kundërshtim me Ligjin për Ndërtim, ndonëse ishte në dijeni për ndërtimin e një kati shtesë (kati i tetë) pa leje ndërtimore. Kjo, sipas Prokurorisë, i ka sjellë përfitim financiar investitorit A.K., duke i shkaktuar njëkohësisht dëm Komunës së Prizrenit dhe duke ndikuar negativisht në pamjen urbane të qytetit.
Po ashtu, më 15 tetor 2024, e dyshuara në të njëjtën cilësi, dyshohet se ka lëshuar në mënyrë të kundërligjshme pëlqimin për ndarjen e parcelës kadastrale për investitorin e njëjtë, duke i mundësuar ndërtimin e dy objekteve në të njëjtën parcelë dhe përfitime të paligjshme pronësore.
Prokuroria Themelore në Prizren rithekson angazhimin e saj në luftën kundër korrupsionit, forcimin e sundimit të ligjit dhe sjelljen para drejtësisë të të gjithë atyre që shkelin ligjin.
