Prokuroria Themelore e Ferizajt ka kërkuar masën e paraburgimit ndaj katër personave të dyshuar për trafikim me narkotikë.
Të dyshuarit E.V., E.E., Q.T. dhe F.K. po hetohen për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”, sipas nenit 267 paragrafi 1, në lidhje me nenin 31 të Kodit Penal të Republikës së Kosovës (KPRK).
Sipas Prokurorisë, të dyshuarit janë arrestuar pas një hetimi të zhvilluar në Ferizaj, gjatë të cilit janë sekuestruar 734.4 gramë kokainë, peshore digjitale, dorëza lateksi dhe materiale të tjera për paketim.
“Nga provat e siguruara gjatë kontrollit të realizuar më 28 tetor 2025 në Ferizaj, dyshohet se më 22 tetor, i pandehuri Q.T., me automjetin e tipit ‘Golf 8’, ngjyrë e zezë, ka dorëzuar të pandehurve E.E. dhe E.V. një çantë ngjyrë krem-kafe me mbishkrimin ‘EUROLAND’, me përmbajtje të substancës së dyshuar narkotike të llojit kokainë,” thuhet në dosjen e Prokurorisë.
Sipas hetimeve, çanta ishte lënë fillimisht në mobilerinë e të pandehurit E.E. në fshatin Greme, ndërsa një ditë më vonë ishte dërguar në shtëpinë e E.V., ku edhe u gjet sasia e kokainës gjatë kontrollit policor.
“Gjatë kontrollit në shtëpinë e të pandehurit E.V. janë gjetur dhe sekuestruar gjithsej 734.4 gramë substancë e dyshuar narkotike e llojit kokainë, peshore digjitale, dorëza lateksi dhe materiale të tjera për paketim,” theksohet më tej në njoftim.
Me vendim të Prokurorit të Shtetit, të pandehurit janë ndaluar për 48 orë, ndërsa Prokuroria ka paraqitur kërkesë për caktimin e masës së paraburgimit ndaj tyre.
