Ka përfunduar gjyqi ndaj Bedri Krasniqit, për akuzën kanosje ndaj Shkumbin Mehmetit. Prokuroria kërkoi dënimin e Krasniqit, kurse vet Krasniqi thotë se këtë lëndë nuk e bën hesap fare.
Janë thënë fjalët përfundimtare në rastin e Bedri Krasniqit, për kanosjen e Shkumbin Mehmetit.
Prokuroria bëri përmbledhjen e ditës kritike dhe Krasniqi pretendohet se kishte kanosur Mehmetin përgjatë transportit të tyre për në Pallat të Drejtësisë ku Mehmeti ishte në cilësinë e dëshmitarit kundër Krasniqit, në një rast tjetër penal.
“Është mirë të kujdesesh për familjen tënde dhe të mos merresh me punët e tjera. E gjithë kjo me qëllim të frikësimit dhe t’i shkaktojë ndonjë të keqe atij apo ndonjë anëtari të familjes”, tha prokurorja Adriana Veseli.
Këtë e mohoi sërish Krasniqi, duke thënë se shkaku i pamjes së jashtme të tij, fjalët që thotë marrin konotacion tjetër.
“Me të vërtetë kam qëlluar pak i ashpër edhe i vrazhdë prej fytyre, por unë nuk i kam fajet. Edhe unë kisha pas qef me kon i bukur si Blero nashta, po s’jam”, tha i akuzuari Bedri Krasniqi.
Ai kërkoi që vendimi i Gjykatës Themelore në Prishtinë, të mos vonohet, çfarëdo qoftë ai.
“Unë kërkoj qysh të keni qef me prokuroren vendosni”, tha Krasniqi.
“Jo, na nuk mirremi vesh me kërkon. Ju çka kërkoni?”, tha gjykatësi, Sabit Sadikaj.
“Unë kërkoj kështu, që nëse dënohem, vetëm një kërkesë e kam, vendimin me ma qu sa ma shpejtë, se më duhet. E nëse më lironi prej akuzave, nuk ta marrë inati”, tha Krasniqi.
Sipas tij, kjo lëndë është e vogël në krahasim me lëndët me të cilat po përballet, prandaj edhe nuk do ta përdor të drejtën e ankesës.
“Nuk do të bëj ankesë ndaj çfarëdo vendimi që merrni. Sepse kjo lëndë, edhe dënimi që ndodh, është e vogël e nuk e përfilli, hiç nuk e boj hesap”, tha ai.
Ndaj Bedri Krasniqit, prokuroria në fjalën përfundimtare kërkoi dënimin maksimal.
