Një grua 80-vjeçare ka humbur jetën në Prizren, ndërsa bashkëshorti i saj 81-vjeçar është arrestuar nën dyshimin se i ka shkaktuar lëndimet që rezultuan fatale.
Sipas Prokurorisë, bazuar në të dhënat fillestare të hetimit, i dyshuari B.D dyshohet se ka privuar nga jeta gruan e tij, duke ushtruar dhunë fizike dhe siç deklaroi prokuroria, rasti ka ndodhur brenda familjes.
Për këtë, Prokuroria ka njoftuar se pas pranimit të informatës në vendin e ngjarjes kanë dalë autoritetet me qëllim të zhvillimit dhe përfundimit të procedurave hetimore në vendin e ngjarjes.
“Me vendim të prokurorit të shtetit, i dyshuari B.D., është ndaluar për 48 orë, për shkak të dyshimit të bazuar se ka kryer veprën penale “Vrasja e rëndë”, sipas Kodit Penal të Republikës së Kosovës. Brenda afatit ligjor, Prokuroria do të parashtrojë kërkesë për caktimin e masës së paraburgimit ndaj të dyshuarit.Prokuroria Themelore në Prizren, në bashkëpunim me Policinë e Kosovës, është duke vazhduar hetimet intensive për zbardhjen e motiveve dhe rrethanave të plota të kësaj ngjarjeje”, thuhet në njoftimin e Prokurorisë.
Ndërkohë, rasti është konfirmuar edhe nga Policia e Kosovës ku kanë deklaruar se trupi i pajetë i 80-vjeçares është dërguar për obduksion në Institutin e Mjekësisë Ligjore në Prishtinë, ndërsa i dyshuari B.D. është ndaluar për 48 orë.
Policia ka njoftuar po ashtu se sipas evidencave zyrtare, “çifti nuk ka pasur raste të mëhershme të dhunës të raportuara dhe në momentin e incidentit kanë qenë vetëm në shtëpinë e tyre”.
“Vrasje e rëndë, i dyshuari është arrestuar Më datë 26 gusht 2026, rreth orës 01:30, Policia e Kosovës ka pranuar informatën se në një shtëpi banimi në Prizren është gjetur pa shenja jete një femër 80 vjeçare (L.D.). Në vendngjarje kanë dalë patrulla policore dhe ekipi i urgjencës mjekësore, të cilët kanë konstatuar vdekjen e viktimës. Në shtëpi është hasur edhe bashkëshorti i saj, i cili është shoqëruar në stacionin policor. Pas ekzaminimit të vendit të ngjarjes nga hetuesit e policisë, forenzikës dhe ekspertët e mjekësisë ligjore, ka lindur dyshimi për veprën penale “Vrasje e rëndë”. Dyshohet se lëndimet e evidentuara në trupin e viktimës janë shkaktuar nga forca duarthatë, pa përdorim të ndonjë arme apo mjeti tjetër. Trupi i pajetë është dërguar në IML Prishtinë për ekzaminim mjekoligjor, ndërsa i dyshuari, bashkëshorti i viktimës, rreth 81 vjeçar (B.D.), është intervistuar në prezencë të avokatit mbrojtës dhe me vendim të Prokurorit të Shtetit është ndaluar për 48 orë. Vlen të theksohet se, sipas evidencave të policisë, çifti nuk ka pasur raste të mëhershme të dhunës të raportuara dhe në momentin e incidentit kanë qenë vetëm në shtëpinë e tyre. Hetimet janë në vazhdim për të përcaktuar motivin dhe rrethanat e plota të rastit”, thuhet në përgjigjen e policisë./teve1.info/
