Prokuroria Themelore në Pejë ka reaguar pas ngjarjes së rëndë që ndodhi të enjten në Bjeshkët e Strellcit, ku një person dyshohet se ka shkaktuar vdekjen e babait të tij.
Zëdhënësi i Prokurorisë Themelore në Pejë, Shkodran Nikçi, bëri të ditur se prokurori i shtetit, në bashkëpunim me njësitë përkatëse të Policisë së Kosovës, ndodhet në vendin e ngjarjes, ku po zhvillohen veprimet e nevojshme hetimore.
“Po ndërmerren të gjitha veprimet e nevojshme hetimore për zbardhjen e plotë të rrethanave të rastit”, tha Nikçi.
Sipas informacioneve fillestare, ngjarja ka ndodhur rreth orës 13:43, në oborrin e një stani në Bjeshkët e Strellcit.
Burime nga hetimi bëjnë të ditur se dyshimet e para janë se vdekja mund të ketë ndodhur aksidentalisht. Megjithatë, autoritetet kanë theksuar se hetimet janë ende në zhvillim dhe se shkaku i saktë i ngjarjes do të përcaktohet pas përfundimit të të gjitha veprimeve hetimore.
