Prokuroria Themelore në Gjilan ka dhënë detaje për vrasjen e djeshme në fshatin Dobërçan të Gjilanit.
Sipas Prokurorisë, dyshohet se personi me inicialet D.T., e ka privuar nga jeta viktimën A.B., duke e goditur disa herë me thikë në pjesë të ndryshme të trupit.
Ndërkohë, me urdhër të prokurorit të shtetit trupi i pajetë i të ndjerit është dërguar për autopsi në Institutin e Mjekësisë Ligjore (IML).
Po ashtu, në njoftim thuhet se prokurori i shtetit brenda afatit ligjor ndaj të dyshuarit do të kërkojë caktimin e masës së paraburgimit në afat prej 30 ditësh nga Gjykata kompetente në Gjilan.
Në njoftimin e lëshuar për media thuhet se i dyshuari është ndaluar për 48 orë, derisa motivi i vrasjes ende nuk dihet.
Lidhur me këtë rast, detaje në raportin ditor ka sjell edhe Policia e Kosovës.
“VRASJE- Gjilan 16.12.2023-21:00. Është arrestuar i dyshuari kosovar pasi që i njëjti dyshohet se me një mjet të mprehtë-thikë ka goditur viktimën mashkull kosovar, të cilit i ka shkaktuar lëndime vdekjeprurëse. Viktima është dërguar në QE-Gjilan, ku mjeku kujdestar ka konstatuar se viktima është pa shenja jete. Me vendim të prokurorit trupi i pa jetë i viktimës është dërguar në IML për obduksion, ndërsa i dyshuari është dërguar në mbajtje. Rasti duke u hetuar”, thuhet në njoftim./teve1.info/
