Prokuroria Themelore në Pejë ka bërë të ditur se ka ngritur aktakuzë ndaj dhjetë personave për veprën penale “Organizimi i skemave piramidale dhe bixhozit të paligjshëm”, si dhe një aktakuzë të veçantë ndaj një personi tjetër për veprën “Mbajtja në pronësi, kontroll ose posedim të paautorizuar të armëve”.
Sipas njoftimit të Prokurorisë, aktakuza e përpiluar prej 26 faqesh përshkruan veprimet inkriminuese të njëmbëdhjetë të pandehurve, ndaj të cilëve ekziston “dyshimi i bazuar mirë” se kanë kryer veprat penale që u vihen në barrë.
Sipas aktakuzës, më 17 gusht 2025, rreth orës 02:00, në lokalin “Te Katamt” në fshatin Isniq të Deçanit, i pandehuri A.O dyshohet se ka organizuar veprimtari të bixhozit të paligjshëm me qëllim përfitimi të kundërligjshëm pasuror për vete dhe persona të tjerë.
Prokuroria thotë se edhe nëntë të pandehur të tjerë kanë marrë pjesë në organizimin dhe zhvillimin e lojërave të fatit.
“Të pandehurit, me dashje dhe në bashkëkryerje, janë kapur duke luajtur bixhoz në një dhomë të veçantë brenda lokalit, të dedikuar posaçërisht për këtë veprimtari”, thuhet në aktakuzë.
Gjatë ndërhyrjes së policisë, disa nga të dyshuarit tentuan të arratisen përmes një dere alternative, por u arrestuan menjëherë.
Në vendngjarje, policia gjeti letra bixhozi dhe shuma të konsiderueshme të hollash, ku tek secili nga të pandehurit u sekuestrua një shumë totale prej 17,578 euro.
Ndërkohë, i pandehuri F.M akuzohet se natën kritike ka poseduar armë pa autorizim, duke kryer veprën penale “Mbajtja në pronësi, kontroll ose posedim të paautorizuar të armëve”.
“Prokurori i çështjes ka propozuar që të gjithë të pandehurit të shpallen fajtorë dhe të dënohen sipas ligjit”, thuhet në njoftim.
Prokuroria thekson se hetimet janë kryer brenda afatit ligjor dhe bazohen në prova të sekuestruara, deklarata, si dhe veprime operative të Policisë së Kosovës.
Të gjithë të pandehurit vazhdojnë të gëzojnë prezumimin e pafajësisë deri në një vendim të formës së prerë nga gjykata.
