Për helmimin nga salmonela të disa fëmijëve në kopshtin nr.1 në Gramsh ka nisur hetimet edhe policia, ku deklaron se janë marrë mostra të ushqimit të kopshtit për t’iu nënshtruar ekzaminimeve të mëtejshme laboratorike.
Sipas policisë, të helmuar kanë përfunduar 6 fëmijë, të cilët kanë kërkuar ndihmë mjekësore në spital, ndërsa janë bërë analizat për të gjithë fëmijët dhe personelin e këtij kopshti.
Gjithashtu, në cilësinë e provës materiale, janë sekuestruar kartelat klinike për 6 fëmijëve të shtruar në spitalin e Gramshit si dhe procesverbalet e kontrollit dhe furnizimit me produkte ushqimore të kopshtit.
Hetuesit kanë marrë edhe mostrat nga ushqimi për ekzaminime të mëtejshme në kushte laboratorike si dhe është bërë bllokimi i produkteve ushqimore të mbetura në kuzhinën e këtij kopshti.
Specialistët për Hetimin e Krimit i kanë referuar materialet procedurale në Prokurorinë e Elbasanit, për vlerësim.
“Specialistët për Hetimin e Krimit në Komisariatin e Policisë Gramsh referuan materialet procedurale në Prokurorinë pranë Gjykatës së Shkallës së Parë të Juridiksionit të Përgjithshëm Elbasan, për vlerësim, pasi më datë 24.05.2025 është marrë dijeni nga rrjetet sociale se në Kopshtin Nr.1 Gramsh janë helmuar nga salmonela disa nga fëmijët e këtij kopshti.
Në spitalin e Gramshit janë paraqitur për të marrë ndihmë mjekësore 6 fëmijë dhe janë bërë analizat për të gjithë fëmijët dhe personelin e këtij kopshti. Në cilësinë e provës materiale janë sekuestruar Kartelat Klinike për 6 pacientët e shtruar në spitalin e Gramshit, janë sekuestruar Procesverbalet e kontrollit dhe furnizimit me produkte ushqimore të Kopshtit Nr.1, si dhe janë marre mostrat nga ushqimi për ekzaminime të mëtejshme në kushte laboratorike. Gjithashtu, është bërë dhe bllokimi i produkteve ushqimore të mbetura në kuzhinën e këtij kopshti. Të gjitha veprimet janë kryer nën drejtimin e Prokurorisë së Juridiksionit të Përgjithshëm Elbasan”, thuhet në njoftimin e Policisë.
Helmimi nga salmonela ndodhi një ditë më parë në kopshtin publik të Gramshit, ku fillimisht u raportuar për 3 fëmijë të helmuar, por numri i tyre është rritur më pas.
Gjendja shëndetësore e fëmijëve mësohet se është nën kontroll, ndërsa priten rezultatet përfundimtare të analizave për të përcaktuar burimin e saktë të infeksionit./rtsh.al
Dyshohet se disa fëmijë janë helmuar në një kopsht publik në Gramsh
