Një përleshje e armatosur ka ndodhur sot rreth orës 13:40 në sheshin “Bulevardi i Dëshmorëve” në Podujevë, ku si pasojë e të shtënave me armë zjarri kanë mbetur të plagosur katër persona.
Bazuar në të dhënat fillestare të hetimit, dyshohet se në ngjarje janë përfshirë persona që kanë lidhje familjare, konkretisht nip dhe dajë, ndërsa motivi i dyshuar lidhet me një mosmarrëveshje të mëhershme.
Menjëherë pas njoftimit nga Policia e Kosovës, në vendin e ngjarjes ka dalë prokurori kujdestar nga Departamenti për Krime të Rënda, i cili, në bashkëpunim me njësitet policore, ka ndërmarrë veprimet e nevojshme hetimore për zbardhjen e plotë të rastit.
Prokuroria ka bërë të ditur se personat e përfshirë dyshohen për kryerjen e veprës penale “Vrasja e rëndë në tentativë”, sipas nenit 173, lidhur me nenin 28 të Kodit Penal të Republikës së Kosovës.
Të lënduarit janë transportuar në Qendrën Klinike Universitare të Kosovës (QKUK), ku po marrin trajtimin e nevojshëm mjekësor.
Prokuroria Themelore në Prishtinë ka bërë të ditur se në koordinim me Policinë e Kosovës, hetimet po vazhdojnë për të sqaruar plotësisht rrethanat e kësaj ngjarjeje./teve1.info/
