Prokurori Beqë Shala i dyshuar për marrje ryshfeti është liruar nga masa e paraburgimit. Atij iu caktua masa e arrestit shtëpiak.
Avokati Naim Rudari konfirmoi për “Betimi për Drejtësi” se Gjykata Themelore në Prishtinë ka refuzuar kërkesën e Prokurorisë për vazhdimin e masës së paraburgimit.
Këshilli Prokurorial i Kosovës (KPK) më 28 tetor 2025 njoftoi se në përputhje me kompetencat e tij kushtetuese dhe ligjore, pas pranimit të njoftimit zyrtar nga Prokuroria Speciale e Republikës së Kosovës (PSRK), përmes të cilit është konfirmuar se është iniciuar hetim penal ndaj të pandehurit Beqë Shala, prokuror në Departamentin e Përgjithshëm të Prokurorisë Themelore në Prizren, vendosi unanimisht që të pezullojë atë përkohësisht nga detyra zyrtare.
Gjykata e Apelit më 6 nëntor ka bërë të ditur se kishte lënë në fuqi vendimin e Gjykatës Themelore në Prishtinë, e cila ia kishte caktuar masën e paraburgimit në kohëzgjatje prej 30 ditësh prokurorit të suspenduar, Beqë Shala i dyshuar për marrje ryshfeti.
Shala është arrestuar në vendin e tij të punës. Arrestimi i tij ka ndodhur gjatë zhvillimit të një hulumtimi nga “Betimi për Drejtësi” që ka siguruar një video-incizim, në të cilin prokurori Shala dyshohet se më 25 gusht 2022 ka pranuar 350 euro në formë ryshfeti nga avokatja Drenushë Berisha për mos parashtrimin e kërkesës për caktim të masës së paraburgimit ndaj klientit të saj, i cili ishte nën masën e ndalimit prej 48 orësh.
“Betimi për Drejtësi” ka raportuar lidhur me dosjen e PSRK-së, sipas të cilës prokurori Shala dyshohet për marrje ryshfeti edhe në një rast tjetër.
Më 1 nëntor 2025, “Betimi për Drejtësi” transmetoi hulumtimin “Ryshfeti që i hoqi maskën prokurorit Beqë Shala”, ku u publikua video-incizimi për rastin ku dyshohet se Shala mori ryshfet nga avokatja Berisha.
