Shoqata e Prokurorëve të Republikës së Kosovës ka reaguar pas publikimit të lajmit të rrejshëm, i cili ka qarkulluar sot në rrjetet sociale për “humbjen e jetës tragjikisht” të prokurores Valbona Dishaj Haxhosaj, e cila punon në Prokurorinë Themelore në Pejë.
Shoqata e Prokurorëve u ka bërë thirrje organeve kompetente që ta hetojnë dhe të zbardhin sa më shpejtë rastin dhe t`i dërgojnë para përgjegjësisë ata të cilët qëndrojnë prapa këtij lajmi të rrejshëm.
“Ne si Shoqatë jemi afër prokurores për t’i ofruar mbështetje dhe kurajo të pa rezervë në mënyrë që ta tejkaloj këtë situatë të rënduar për të dhe familjen e saj dhe njëherit ju bëjmë thirrje organeve kompetente konkretisht atyre të sigurisë dhe drejtësisë të hetojnë dhe sa më shpejt të zbardhin rastin dhe ti dërgojnë para përgjegjësisë ata të cilët qëndrojnë prapa këtij lajmi të rrejshëm”, thuhet në njoftim.
Ndryshe, Shoqata e Prokurorëve e ka dënuar publikimin e këtij lajmi të rrejshëm, ku thekson se përdorimi i këtyre lajmeve që kanë synim frikën dhe shantazhin janë të papranueshme.
“Shoqata e Prokurorëve dënon fuqishëm publikimin e këtij lajmi te rrejshëm dhe thekson se format e tilla të përdorimit të këtyre lajmeve të rrejshme që për synim kanë frikën dhe shantazhin janë të papranueshme dhe të drejtuara jo vetëm ndaj tendencës për frikësim të prokurores Valbona Dishaj Haxhosaj, por edhe ndaj autoritetit tërësor të sistemit prokurorial të Republikës së Kosovës”, ka deklaruar Shoqata e Prokurorëve./teve1.info/
