Kjo synohet të bëhet përmes projektligjit për masat e përkohshme të produkteve themelore, i cili pritet të diskutohet e votohet nesër në Kuvend.
Ligji parasheh caktimin e marzhës së fitimit për shitësit me shumicë e pakicë, ndalimin e largimit të produktit nga shitja si dhe detyrimin e operatorit ekonomik për ta ruajtur pjesën e caktuar të stokut.
Megjithatë njohës të fushës së ekonomisë e vlerësojnë këtë politikë joadekuate.
Profesori universitar Ermal Lubishtani vlerëson se problematike do të jetë vet zbatueshmëria e ligjit.
“Me këtë iniciativën e re monitorimi i implementimit të kësaj iniciative, ligji ka me qenë shumë ma i vështirë sepse rritet gama e produkteve shumë edhe me këtë rast kompleksiteti i implementimit”, tha Lubishtani.
Sipas tij ky projektligj mund të jetë goditje për bizneset e vogla.
“Ky mund t’i afektojë negativisht bizneset e vogla të cilat s’kanë kapacitete për me i përballu për shembull marzhat e vogla ose psh nuk kanë rezerva të mjaftueshme tash që nënkupton momentin kur fillojnë t’i aplikojnë masat e reja mund të kenë probleme”, shtoi ai.
Me caktimin e çmimit tavan nuk po pajtohet as eksperti i kësaj fushe Musa Limani, teksa i njëjti jep një ide tjetër për zgjidhjen e krizës.
“Shteti duhet të intervenojë me një politikë aktive fiskale e cila duhet të jetë ekspansioniste që në vete nënkupton që qeveria duhet të hapë punë publike, ku hapen vendet e reja të punës dhe në këtë mënyrë në të njëjtë rrit ofertën dhe kërkesën agregate dhe në këtë mënyrë e stabilizon tregun në Kosovë”, tha Limani.
Televizioni ka provuar të marrë qëndrim për këtë projektligj nga deputetë të partive kryesore opozitare gjatë ditës, por ata nuk kanë pranuar të prononcohen për këtë çështje.
Sipas të dhënave të Agjencisë së Statistikave çmimet për produktet bazë ushqimore janë rritur për rreth 13 % nga shtatori i vitit të kaluar.
Kronika e gazetarit Gojart Jashari.
