Zgjedhjet lokale në katër komunat veriore të Kosovës të banuara më shumicë serbe shkaktuan tensione të larta.
Këto zgjedhje emisari evropian për dialog, Miroslav Lajçak i cilësoi si mina tokësore që fatkeqësisht u shkelën.
E profesori nga Britania, Eric Gordy, vlerëson se serbët kanë gabuar rëndë që vendosën t’i bojkotojnë zgjedhjet në katër komunat veriore.
Sipas tij edhe pse zgjedhjet ishin me legjitimitet të dobët, ato prodhuan disa rezultate.
“Fillimisht dua të them se qytetarët serb gabuan që nuk dolën në zgjedhje, zgjodhën një strategji të gabuar sepse pavarësisht që pjesëmarrja ishte e ulët në zgjedhje ato prodhuan disa rezultate. Meqë serbët e panë që kishin gabuar me atë strategji, synuan që përmes protestave të krijojnë një atmosferë pasigurie në veriun e vendit. Tani nuk mund të them nëse beri mirë apo jo qeveria, kur u vendos që kryetarët të shkojnë në komuna për ta ushtruar detyrën, por mund të them këtë gjë, se protestat e dhunshme ishin mirë të organizuara. Megjithatë presidentit Vuçiq i konvenuan këto ngjarje në Kosovë, sepse po e tërhoqën vëmendjen nga protestat në Beograd”, thotë ai për Tëvë1.
Tutje Gordy, shprehet i befasuar me qasjen e Shteteve të Bashkuara të Amerikës në procesin e dialogut mes Kosovës dhe Serbisë.
Madje profesori thotë Presidenti aktual i SHBA-ve, Joe Biden, ka vazhduar me politika të ngjashme me ato të administratës Trump.
“Gjatë kohës sa Trump ishte President i Shteteve të Bashkuara të Amerikës, ishte e qartë se pati një mbështetje më të madhe për Serbinë, i kemi parë veprimet jo racionale të Richard Grenell karshi Kosovës. Por është befasi se tani po shohim vetëm një vazhdimësi të asaj politike, pavarësisht që Presidenti Biden premtoi një qasje të re, por nuk është se ka ndryshuar ndonjë gjë. Dua ta them edhe këtë që në media nuk flitet shumë por presidenti i Serbisë, Aleksandar Vuçiq është një lojtari i zoti në politikë, dhe ai ka raporte shumë të mira me shtetet perëndimore”
Komuniteti ndërkombëtar e ka bërë përgjegjëse Kosovën për tensionet e krijuara ne veriun e vendit, duke i vendosur edhe sanksione.
