Pjesëtari i bandës së armatosur në veri Vladimir Toliq, po vazhdon të merr trajtimin mjekësor në klinikën Ortopedike në QKUK. Ndërkohë sipas njohësve të çështjeve ligjore dhe organizatave për të drejtat e njeriut ky rast përveç zyrtarëve policorë të Kosovës po monitorohet edhe nga ekipe të KFORI-it, derisa theksojnë se vizitat në rastet e tilla duhet të jenë me leje nga gjykata.
Janë bërë dy ditë që kur njëri nga pjesëtarët e bandës së armatosur, që sulmoi policinë e Kosovës në veri, po qëndron në QKUK.
49 vjeçari, Vladimir Toliq iu nënshtrua një operimi në këmbë në klinikën e Ortopedisë, pas plagosjes.
Drejtori i kësaj klinike Gani Jashanica, përmes telefonit tha se gjendja shëndetësore e pacientit është e mirë dhe se i njëjti pritet të merr trajtim mjekësorë.
Sipas njohësve të çështjeve ligjore dhe organizatave për të drejtat e njeriut ky rast përveç nga zyrtarët policorë të Kosovës po monitorohet edhe nga ekipe të KFORI-it.
Anton Ndrecaj nga Instituti Clard, thotë se pavarësisht se kush është i ndaluar, ligji ofron siguri dhe trajtim të barabartë për një proces të drejtë gjyqësor.
“Për njërin nga të arrestuarit i cili supozohet mbi bazën e asaj që kanë fillu hetimet për aktivitete terrorizmi dhe cenim të rendit kushtetues natyrisht ai duhet të jetë gjithmonë nën mbikqyrjen e PK-së dhe njësive speciale dhe nën mbikqyrjen dhe trajtimin e mjekëve të cilët duhet të të përkujdesen për shëndetin e tij në mënyrë që ai të jetë i gatshëm të ballafaqohet me drejtësi. Deri në momentin kur ai ndjehet mirë pastaj duhet të bëhet transferimi në burg deri në fillimin e procesit apo edhe perfundimin e procesit të epilogut gjyqësor”, tha Anton Nrecaj nga Instituti Clard.
Ndërkohë Valentina Demolli nga Këshilli për Mbrojtjen e të Drejtave dhe Lirive të Njeriut, thotë se vizitat në rastet e tilla duhet të jenë me leje nga gjykata.
“Në rastin konkret janë Policia e Kosovës që kanë ofruar dhe po ofrojnë siguri fizike për përsonin i cili është në ndalim e po trajtohet në QKUK, dhe në bazë të informatave që kemi dhe procedurave ligjore të gjthë ata të tjerët që duan të takojnë ose ta vizitojnë këtë person duhet patjetër të marrin një leje nga gjykata, përkatësisht nga gjyqtari i lëndës. Normalisht në rastet e tjera do duhej të kishte edhe monitorues të pavarur mirëpo përderisa ka pjesëtarë të mjaftueshëm të PK-së ne kemi besimin e plotë që gjithqka ka shkuar sipas procedurave ligjore”, u shpreh Valentna Demollil nga KMDLNj.
Më 24 shtator, në orët e hershme të mëngjesit, Policia e Kosovës u sulmua nga një grup personash të maskuar dhe të armatosur derisa po shkonte për ta hetuar bllokimin e një rruge nga dy kamionë pa targa në fshatin Banjskë të Zveçanit.
