Mbi 2 mijë subjekte shëndetësore i kanë nën vëzhgim.
Mirëpo tash e shumë vite, këto terrene i mbulojnë vetëm 12 inspektorë.
Edhe dalja e tyre në inspektime është e vështirë.
Kjo për shkak se shumica e tyre janë afër pensionimit.
“Problemi që e kemi pa që ekziston në këtë inspektorat është se një numër i madh i zyrtarëve të këtij inspektorati janë në moshë kryesisht afër pensionimit dhe në një formë detyra e inspektorëve është kryesisht tereni sidomos në këtë rast dhe është problematik në këtë çështje” tha Egzon Azemi nga Ministria e Shëndetësisë.
E sipas Azemit, që në muajin Gusht të vitit të kaluar, në Inspektoratin Shëndetësor fazën e testimeve e kanë kaluar 25 inspektorë të ri dhe 8 në Inspektoratin Farmaceutik.
Por që nga ajo kohë, ata ende nuk kanë nënshkruar kontratë pune.
Prandaj, Ministria e Shëndetësisë ka një vërejtje për Këshillin e Pavarur të Mbikqyrësve Civil.
“I trajton me jo seriozitet ankesat dhe e ka të drejtë ligjore dhe e ka të drejtë ligjore që çdo ankesë ta shtyjë dy herë nga 45 ditë dhe kështu ka vepru me secilën prej tyre. Në vend që të mblidhen e t’i trajtojnë më shpejt sepse jemi t’u folë për inspektorë shëndetësorë”, tha ai
E në Këshillin e Pavarur Mbikëqyrës për Shërbimin Civil të Kosovës thanë që përgjegjëse për procedurat e pranimit është Ministria e Punëve të Brendshme.
“Ju njoftojmë që Këshilli I Pavarur Mbikëqyrës për Shërbimin Civil të Kosovës sipas nenit 6 paragrafi 1 të Ligjit Nr.06/L-048 për Këshillin e Pavarur Mbikëqyrës për Shërbimin Civil të Kosovës, ka këto funksione themelore: 1.1. shqyrton dhe merr vendime për ankesat e nëpunësve civil dhe kandidatëve për pranim në shërbimin civil; 1.3. monitoron institucionet e administratës publike që kanë të punësuar nëpunës civil, lidhur me zbatimin e rregullave dhe parimeve të legjislacionit për shërbimin civilë.
Bazuar në këtë meqë procedurën e pranimit për pozitat e inspektorëve mjekësor dhe atyre farmaceutik, është zhvilluar Departamenti për Menaxhimin e Zyrtarëve Publikë në kuadër të Ministrisë së Punëve të Brendshme, atëherë informacionet e tilla mund kërkohen nga ky institucion”, thuhet nga kë këshill.
Megjithatë Ministria e Punëve të Brendshme thekson që ende janë në pritje të KPMSHCK-së lidhur me vendimet e ankesave për inspektorët.
“Ju informojmë se për Grupin “Specialistë të përgjithshëm të Shëndetësis/Mjekësisë” për pozitat: Inspektor Shëndetësorë dhe Grupin “ Specialist të Farmaceutikes” për pozitat: Inspektor Farmaceutik, kemi ankesa në KPMSHCK dhe jemi në pritje të vendimeve lidhur me këto ankesa. Prandaj, deri në pranimin e të gjitha vendimeve ndaj ankesave nga KPMSHCK, nuk mund të bëhet emërimi i kandidatëve fitues për këto procedura”, thuhet nga MPB-ja.
Procesi i rekrutimit të inspektorëve të rinj sipas ministrit Vitia ka qenë në fazën finale që në muajin shtator të vitit të kaluar.
Ndërsa përmes tyre, Vitia kishte theksuar se do të shtohet dinamika e punës dhe cilësia e performancës në zbatimin e ligjit.
