Më shumë se 2,000 fluturime janë anuluar gjatë dy ditëve të fundit në aeroportet e Mbretërisë së Bashkuar, pas një problemi teknik që preku sistemin e Shërbimeve Kombëtare të Trafikut Ajror (Nats) të martën.
Sipas kompanisë së analizave të aviacionit Cirium, ndërprerja ka shkaktuar vonesa dhe anulime të shumta, duke prekur dhjetëra mijëra pasagjerë që udhëtojnë drejt dhe nga Britania e Madhe.
Nats ofron shërbime të kontrollit të trafikut ajror në 15 aeroporte në Mbretërinë e Bashkuar.
Edhe pse problemi teknik është zgjidhur, pasojat e tij kanë vazhduar edhe gjatë ditës së dytë, me anulime dhe vonesa të shumta që kanë shkaktuar kaos në aeroportet britanike.
Shërbimet Kombëtare të Trafikut Ajror kanë përsëritur se problemi teknik i së martës, i cili shkaktoi ndërprerjet e fundit, nuk ishte “i njëjti problem” me defektin e kontrollit të trafikut ajror që shkaktoi kaos në gusht të vitit 2023.
Drejtori ekzekutiv i Nats, Martin Rolfe, është thirrur këtë mëngjes nga sekretarja britanike e Transportit, Heidi Alexander, për t’iu përgjigjur pyetjeve lidhur me problemin e sistemit dhe pasojat e tij në trafikun ajror.
Ndërkohë, Ryanair, një nga linjat ajrore më të mëdha që operojnë në Mbretërinë e Bashkuar, i ka bërë thirrje Alexander të shkarkojë Rolfe.
Edhe shefi i Wizz Air në Mbretërinë e Bashkuar e ka nxitur sekretaren e Transportit të marrë në konsideratë dorëheqjen e tij.
