Web faqet e komunave të Kosovës po vazhdojnë të përballen me probleme tash e dy vjet. Këto probleme sipas Asociacionit të Komunave të Kosovës (AKK), po ndikojnë në ofrimin e transparencës së komunave.
Sipas AKK-së që dy javë në web faqe nuk ka mundësi në publikimin e dokumenteve, ndërsa sipas tyre Qeveria po hesht për këtë problematik.
“Shumica e indikatorëve në Grantin e Performancës që masin transparencën komunale, kanë të bëjnë me afatet ligjore të publikimit të dokumenteve të ndryshme. Zyrtarët për Komunikim me Publikun në Komuna, janë duke shqyrtuar mundësinë të mos raportojnë fare në platformën e Grantit të Performancës për vitin 2022, pasi që të gjitha penalizohen për shkak se shumica e indikatorëve në këtë Grant, kanë të bëjnë me publikimin e dokumenteve”, thuhet në komunikatën e AKK-së, përcjell teve1.info
Mungesa e funksionimit të web- faqeve po ndikon edhe në matjen e përfomrancës nga OJQ-të, nga Auditorët e Jashtëm, qytetarët, mediat dhe në secilin dimension tjetër që ka të bëjë me transparencën komunale.
“Ky është viti i dytë, kur zyrtarët e ngarkuar për publikimin e dokumenteve, kanë tejet vështirësi dhe shumë herë edhe nuk janë funksionale web faqet, ndërsa Qeveria asnjë herë nuk është marrë me këtë problem përkundër që është nën menaxhimin e tyre. Këto shqetësime ka kohë që janë ngritur nga Kolegjiumi për Komunikim me Publikun dhe Kolegjiumin e Zyrtarëve Komunal të IT-ve në kuadër të Asociacionit të Komunave të Kosovës por deri më tani nuk është hetuar ndonjë vullnet nga niveli qendror për të zgjidhur këtë problem”, thuhet në komunikatë.
