Një incident tragjik ka ndodhur të mërkurën në Prizren, ku një punëtor ndërtimi, 40-vjeçari N.XH. nga Drenasi, ka humbur jetën pasi ra nga kulmi i një ndërtese gjatë punës.
Ngjarja është raportuar më 30 korrik 2025, rreth orës 12:45, kur viktima pësoi lëndime të rënda trupore pas rrëzimit nga një lartësi e konsiderueshme. Ai u transportua me urgjencë në Spitalin Rajonal të Prizrenit, ku mjekët konfirmuan vdekjen e tij si pasojë e lëndimeve të marra.
Zëdhënësi i Policisë për Rajonin e Prizrenit, Shaqir Bytyqi, konfirmoi rastin dhe bëri të ditur se janë njoftuar menjëherë hetuesit kujdestarë si dhe prokurori i shtetit. Me urdhër të këtij të fundit, është iniciuar procedurë penale për veprën penale: “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës.”
Policia ka nisur hetimet për të sqaruar rrethanat e incidentit dhe ka marrë dëshmi nga të pranishmit në vendin e ngjarjes.
Ky rast ngre edhe një herë shqetësimin për sigurinë në vendin e punës, veçanërisht në sektorin e ndërtimtarisë. Autoritetet kanë bërë thirrje për respektim të rreptë të standardeve të mbrojtjes dhe sigurisë në punë për të parandaluar raste të tilla tragjike.
