I dërguari i posaçëm i Bashkimit Evropian për dialog, Miroslav Lajçak, pas ftesës nga partnerët në Shtetet e Bashkuara të Amerikës, udhëtoi për në Washington.
Të martën, ai mori pjesë në një diskutim publik në Këshillin Atlantik për të diskutuar zhvillimet e fundit në rajon.
Me fokus të veçantë situatën e krijuar në veriun e Kosovës.
Njohësit e fushës, vlerësojnë se nga ky udhëtim do të dalin deklarata të prera.
Ish-diplomati, Blerim Canaj thotë se në një pozicion më të vështirë do të mbetet pala kosovare.
“Kjo situatë do ta sjell Kurtin në një situatë më të vështirë, sepse po e shohim edhe nga mediat e huaja edhe nga analizat e ndryshme të faktorit ndërkombëtar të cilët po e shohin fajtor Kurtin për eskalimin e situatës dhe natyrisht që do të ketë njëfar presioni kundrejt tij”, tha Canaj.
Ndërkohë politologu Fidan Ukaj vlerëson se në rast të moszbatimit të kërkesave që mund të dalin nga BE-ja dhe SHBA-ja, për palët, do të ketë pasoja.
“Do të jenë të qartë sa i përket palëve si për Serbinë dhe Kosovën se nëse nuk do të bëhet ulja e tensioneve dhe kthimi në procesin e dialogut, mund të pasojnë sanksione të menjëhershme për të dyja palët. Veprimet e menjëhershme që Z.Lajçak i ka paralajmëruar për palët dhe do të jenë të menjëhershme, shumë strikte dhe rigoroze për palët nëse nuk do të ulin tensionet dhe nuk do ti kthehen zbatimit të marrëveshjes”, deklaroi Ukaj.
Që prej 26 majit, kur policia asistoi kryetarët e rinj të komunave veriore të futën në zyret komunale, bashkësia ndërkombëtare s’i ka gjetur akoma instrumentet që palët të binden për de-eskalim të situatës në atë pjesë të Kosovës.
Kronika e gazetares Valëza Sylejmani.
